Green Card олиш учун 1000 дан ортиқ сохта никоҳ тузилган

Нью-Йорк жанубий округида очилган айбловга кўра, 2016-йилдан 2026-йил июлигача давом этган схема доирасида 11 нафар шахс АҚШ фуқаролари билан Хитой фуқаролари ўртасида сохта никоҳлар уюштирган. Схема асосан Нью-Йоркда амалга оширилган бўлса-да, Коннектикут, Массачусетс, Пенсильвания, Кентукки, Теннесси, Жоржия ва Флорида штатларида, шунингдек, Вануату ва Хитойда ҳам фаолият юритган.

Хизматларнинг тўлиқ пакети учун хитойлик мижозлар 100 минг долларгача тўлаган. Никоҳга рози бўлган АҚШ фуқароларига эса босқичма-босқич 30 минг долларгача пул берилган. Воситачилар ҳар бир жалб қилинган америкалик учун 5 минг долларгача комиссия олган.

Никоҳларни ҳақиқийдек кўрсатиш мақсадида сохта тўй маросимлари ҳам ташкил этилган. Жуфтликлар анъанавий хитой миллий кийимларида суратга тушган, маросимларга дўстлари ва қариндошлари таклиф қилинган. Шу орқали ҳақиқий тўй ўтказилгани ҳақида таассурот яратишга уринишган. Айблов ҳужжатларида бундай суратлар далил сифатида келтирилган.

АҚШ Бош прокурори Тодд Бланче мазкур ишни АҚШ тарихидаги энг йирик никоҳ фирибгарлиги ҳолатларидан бири деб атади.

Green Card нима ва нега унга бунча пул тўланади?

Green Card — АҚШда доимий яшаш ва ишлаш ҳуқуқини берувчи ҳужжат. Унинг эгаси мамлакатда доимий яшаши, қонуний ишлаши ва таълим олиши, шунингдек, муайян талаблар бажарилгач, АҚШ фуқаролигига ариза топшириши мумкин.

Green Card олишнинг қонуний йўлларидан бири — АҚШ фуқароси билан ҳақиқий никоҳ қуриш орқали оилавий иммиграция мақомини олиш. Айнан шу имконият айрим фирибгарлар томонидан ноқонуний схемаларда фойдаланилган: улар ҳақиқий оила қуриш учун эмас, балки иммиграция талабларини четлаб ўтиш мақсадида сохта никоҳлар ташкил қилган.

Бунинг ўзбекистонликлар учун қандай аҳамияти бор?

Ўзбекистон фуқаролари орасида ҳам АҚШга кўчиб бориш ва у ерда доимий яшаш истаги юқори. Бунинг қонуний йўлларидан бири Diversity Visa (DV) дастури ҳисобланади.

Шу билан бирга, айрим воситачилар ёки ўзини "маслаҳатчи" деб таништирувчи шахслар АҚШ фуқароси билан сохта никоҳ тузиш орқали Green Card олиб беришни ваъда қилиши мумкин.

Бундай схемаларда иштирок этиш АҚШ қонунчилигига кўра жиноий жавобгарлик, катта миқдордаги жарималар, иммиграцион мақомнинг бекор қилиниши, депортация ва АҚШга киришга узоқ муддатли ёки доимий тақиқ каби жиддий оқибатларга олиб келиши мумкин.

Мазкур ҳолат АҚШ тергов органлари бундай схемаларни узоқ вақт давомида текшириши ва иштирокчиларни жавобгарликка тортиши мумкинлигини кўрсатади. Шу сабабли Green Card'ни "кафолатлаб бериш"ни ваъда қилаётган шахслар ёки воситачиларга ишонишдан олдин уларнинг таклифлари қонунийлигини синчиклаб текшириш муҳим.