Покистон, Саудия Арабистони ва Туркия қўшма мудофаа битимини имзолади

7 август куни Покистон, Саудия Арабистони ва Туркия жамоавий хавфсизлик, мудофаа соҳасидаги ҳамкорлик ҳамда минтақавий барқарорликка содиқлигини тасдиқловчи Макка қўшма мудофаа битимини имзолади.

Покистон ташқи ишлар вазирлигига таянган ҳолда The Express Tribune нашрининг хабар беришича, келишув тажовузкорлик ҳаракатларига қарши жамоавий тийиб туриш механизмини белгилайди. Унга кўра, уч давлатдан бирига қарши амалга оширилган қуролли ҳужум учала давлатга қарши ҳужум сифатида баҳоланади.

Вазирлик ушбу пакт уч давлат ўртасидаги узоқ йиллик тарихий алоқалар, мустаҳкам биродарлик ришталари, исломий бирдамлик, стратегик манфаатлар ва мудофаа соҳасидаги ҳамкорликка асосланганини таъкидлади.

Келишув Покистон, Саудия Арабистони ва Туркия ўртасида мудофаанинг барча йўналишларида ҳамкорликни кучайтиришни ҳам назарда тутади.

Келишувни Покистон Бош вазири Шаҳбоз Шариф, Туркия Президенти Ражаб Тоййиб Эрдоған ҳамда Саудия Арабистони валиаҳд шаҳзодаси ва Бош вазири Муҳаммад бин Салмон Маккадаги Ас-Сафо саройида бўлиб ўтган Қўшма мудофаа бўйича Макка ал-Мукаррама саммитида имзолаган.

Уч мамлакат етакчилари Саудия Арабистони, Покистон ва Туркия ўртасидаги узоқ йиллик муносабатларни, шунингдек, ўзаро манфаатли бўлган бир қатор масалаларни кўриб чиққан.

Қўшма Штатлар минтақавий таҳдидларни тийиб туришга уринаётган бир пайтда, бу уч давлат Яқин Шарқдаги тартибсизликлар ва Исроилнинг тобора кучайиб бораётган кескинлигидан хавотирда эканлигини маълум қилган.

Ушбу мудофаа пакти, шунингдек, Саудия Арабистони ва Покистон ўртасида 2025 йил сентябр ойида имзоланган “Стратегик ўзаро мудофаа тўғрисидаги битим”га асосланади.

Ўша вақтдаги Покистон-Саудия қўшма баёнотида ҳам “мамлакатлардан бирига қилинган ҳар қандай тажовуз ҳар иккисига қилинган тажовуз деб ҳисобланиши” қайд этилган.