Рютте: «Россия тушуниши керак – НАТО унинг армиясидан анча кучли»

Вашингтондаги чиқишида Рютте НАТО давлатлари мудофаа соҳасидаги ҳамкорликни сезиларли даражада кучайтиришини маълум қилди.

Унинг таъкидлашича, Туркиянинг ўзида мудофаа соҳасида фаолият юритаётган қарийб 3000 та компания бутун НАТО ҳудуди учун маҳсулот ишлаб чиқармоқда.

Янги йирик шартномалар имзоланади

Рюттенинг маълум қилишича, 5–7 июль кунлари бўлиб ўтадиган НАТО саммитининг биринчи куни тўлиқ мудофаа саноатига бағишланади.

«Саммитнинг илк кунини тўлиқ мудофаа саноатига бағишлаймиз. Унда жуда кўп янги шартномалар, ҳамкорлик келишувлари ва йирик битимлар имзоланганига гувоҳ бўласиз», — деди у.

Бош котибнинг сўзларига кўра, бу қадамлар нафақат НАТО аҳолисига, балки Россияга ҳам аниқ сигнал бўлади.

«Бу НАТО ҳудудида яшовчи бир миллиард аҳолимизга аниқ сигнал бўлади: биз ҳақиқатан ҳам зарур чораларни кўряпмиз», — деди Рютте.

«Биз буни сиздан яхшироқ уддалаяпмиз»

Рютте Россияга мурожаат қилиб, НАТО ҳарбий ишлаб чиқариш имкониятлари бўйича анча илгарилаб кетганини таъкидлади.

«Бу россияликларга ҳам сигнал: биз сизнинг нима қилаётганингизни кўриб турибмиз ва бу ишни сиздан кўра яхшироқ уддалаяпмиз», – деди НАТО раҳбари.

Аввалроқ халқаро матбуотда Сувалки йўлаги эҳтимолий НАТО–Россия қарама-қаршилигида энг муҳим стратегик нуқталардан бири бўлиши мумкинлиги ҳақида таҳлиллар эълон қилинган эди. Ушбу қуруқлик йўлаги Болтиқбўйи давлатларини НАТОнинг қолган ҳудуди билан боғлаб туради.