“Ayollarni pasportga roʻmolini yechib tushishga majburlashni ham toʻxtatish kerak” – Alisher Qodirov

«Milliy tiklanish» demokratik partiyasi rahbari Alisher Qodirov oʻzining telegramdagi kanali orqali dunyoviylik va eʼtiqod masalasida tenglik tarafdori ekanligini yozib qoldirdi. Unga koʻra, har ikkisida qonun talablari ustuvor boʻlishi kerak.

«Oʻzbekistonning dunyoviy davlat ekanligi tortishilmaydi. Dunyoviy davlat koʻpchilik saylagan parlament tomonidan qabul qilinib, koʻpchilik saylagan prezident tomonidan maqullangan qonunlarni buzmagan holda, oʻzi istaganidek yashash imkonini beradi.

Vatanimizda barcha millat va dunyoqarashdagi vatandoshlar emin-erkin, qonunlarni buzmagan holda farovonlikka intilishi uchun sharoit yaratish ustuvor maqsad ekanligi mustahkam belgilangan. Hamma teng va hech kim kamsitilmasligi kafolatlangan.

Agar biron vatandosh pivo ichmoqchi boʻlsa, ichadi, bu uning tanlovi, ichmaydigan vatandosh ichmaydi va buning sababini har ikki toifa hech kimga izoh berishga majbur emas.

Alkogolni ichish mumkin, lekin reklama qilish mumkinmas, bu amaldagi qonunda belgilangan, albatta, parlament saylovlarini mutlaqo yutadigan biron siyosiy kuch qonunni oʻzgartirib alkogolni «milliy qadriyat», bir jinslilarni oila qurish talabini esa erkin tanlov sifatida norma qilishi ham mumkin, bunga siz huquq berasiz…» – deydi deputat.

U oʻzi rahbarligidagi «Milliy tiklanish» partiyasining pozitsiyasi haqida toʻxtalar ekan, «partiya har qanday taraqqiyotni qadriyatlarga tayanishi kerak degan gʻoyasida mustahkam» ekanligini eslatadi.

«Jenifer Lopesning konserti serdaromad ish va yopiq tadbir, narkotika tarqatib, davlatga qarshi targʻibot qilmasa, oʻtkazadi, tanasini koʻrsatish uning tanlovi, koʻrish esa tadbirga bilet olganlarniki, dunyoviylik shu!

Lekin, xuddi shunday oʻranib yurmoqchi boʻlgan ayol vatandoshni ham tanlovi qonun bilan himoya qilingan. Yalongʻoch namoyishini dunyoviylik deb qabul qildik, endi yopinib yurish huquqiga ham dahl qilmaslik kerakligini qabul qilaylik. Lopesga qanday kiyinishni oʻrgatmaganimizdek, eʼtiqodli ayollarimizga roʻmolni qanday oʻrashni oʻrgatishni, qolaversa, shu yoshga kelib eʼtiqodi talabiga rioya qilgan ayollarni pasportga roʻmolini yechib tushishga majburlashni ham toʻxtatish kerak. Identifikatsiya talablari yuzni ochiq boʻlishini taqozo qiladi, sochni emas. Lopesga koʻrsatgan bagʻrikengligimizni dindor ayollarimizga ham koʻrsataylik.

Dunyoviylik ishonganga ham, ishonmaganga ham teng boʻla olish degani, zoʻrning zaifga hayotdan dars berishi emas», – deb yozadi Alisher Qodirov.