Berdimuhamedovlarning surati tushirilgan gazetalarni oʻqishdan boshqa maqsadda foydalanish taqiqlandi

Unda aytilishicha, Berdimuhamedovlar tasviri tushirilgan gazetalardan hojatxona qogʻozi sifatida foydalanish, olov yoqishda ishlatish hamda narsalarni oʻrashda qoʻllash taqiqlangan. Buning uchun esa davlat xodimlaridan majburiy tarzda "hukmron oilaning fotosurati tasvirlangan gazeta va jurnal sahifalarini ehtiyot qilish” toʻgʻrisida yozma vaʼdalar olinmoqda. 

Shundoq ham Turkmanistonda qattiq nazorat qilinib, senzura ostida yuritiladigan gazetalar orqali kam yangiliklarni oʻqish mumkin. Davlat xizmatchilari va talabalarning hukumat qoʻl ostida chop etiladigan gazetalarga majburiy tarzda obuna qilinishi esa matbuotning erkin emasligidan darak beradi. 

Gʻarbiy Bolqon viloyatida "Ozodlik radiosi"ning turkman xizmati bilan bogʻlangan davlat xizmatchisiga koʻra, uning shahridagi rasmiylarga shu yilning boshidan beri prezident surati tushirilgan gazetalarni ifloslantirmaslik doimiy ravishda aytib kelingan. 

Buning ustidan nazorat qilish uchun rasmiylar gazetalarning har bir sahifasida QR kodlari chop etishni rejalashtirmoqda. Boshqa davlat xizmatchisining soʻzlariga koʻra, bu ularga kirlangan sahifalarni kuzatishga imkon beradi.

"Biz endi hatto bolalarning uyda gazetalarga tegishidan qoʻrqamiz. Agar kichkina bola prezidentning fotosuratini yirtsa yoki buzsa, biz ish joyimizdan ayrilishimiz mumkin", deydi u.

Koʻpchilikka maʼlumki, Chegara bilmas muxbirlar tashkiloti tomonidan Turkmanistonda matbuot erkinligi doimiy ravishda past baholanib kelingan. Tashkilotga koʻra, jurnalistikasi faqat davlat tizimini maqtashdan iborat boʻlgan Turkmanistonda mustaqil ommaviy axborot vositalari mavjud emas.

"Hukumatdan norozi boʻlganlar toʻxtovsiz ravishda taʼqib qilinib, kaltaklanilmoqda, qiynoqqa solinmoqda, qamoqqa olinish va hatto oʻldirish bilan qoʻrqitilmoqda. Bundan odamlarning koʻpchiligi chet elga chiqib ketgan", deyiladi xabarda.