Turkmanistonda ish haqi va nafaqalarni oshirmaslik taklif qilindi

U Xalq Maslahati majlisida, xalq hokimiyatining oliy organi rahbari Gurbanguli Berdimuhamedov ishtirokidagi tadbirda chiqish qilgan.

Otamurodovning soʻzlariga koʻra, hukumat saʼy-harakatlari tufayli koʻp yillardan beri ish haqi, pensiya, davlat toʻlovlari va talaba stipendiyalari muntazam ravishda oshirib kelinmoqda. U xalqning “tinch, farovon va baxtli hayot kechirayotgani”, aholining ijtimoiy-maishiy sharoiti esa yuqori darajaga yetganini taʼkidlagan.

Oqsoqol bunday imtiyozlar dunyoda boshqa hech bir mamlakatda mavjud emasligini, bugun esa har bir oila zarur boʻlgan narsani olishga imkoniyati yetishini aytib, shuning uchun maosh va toʻlovlarni oshirishni toʻxtatish lozimligini bildirgan. U Berdimuhamedovdan ushbu tashabbusni qoʻllab-quvvatlashni soʻragan.

Otamurodovning fikricha, oshirishdan tejab qolingan mablagʻlarni “mamlakatni yanada rivojlantirish” hamda “boshqa muhim yoʻnalishlarga” yoʻnaltirish mumkin.

“Turkmanistonda oʻn yildan ortiq vaqt davomida davlat rahbarining farmonlari asosida har yili ish haqi, pensiya, davlat toʻlovlari va stipendiyalar oʻrtacha 10 foizga oshirib kelinmoqda. Hozirda eng kam ish haqi 1410 manatni (taxminan 400 dollar), pensiya esa 550 manatni (taxminan 155 dollar) tashkil etadi”, – deyiladi xabarda.

Turkmen news xabariga koʻra, oqsoqolning bu taklifi turkman ijtimoiy tarmoqlarida qizgʻin muhokamalarga sabab boʻlgan. Hatto Turkmenportal nashri bu xabar ostidagi izohlarni yopib qoʻyishga majbur boʻlgan.

Foydalanuvchilar inflyatsiya odatda indeksatsiya qilinadigan 10 foizdan ancha yuqori ekanini taʼkidlagan: masalan, goʻsht narxi yarim yil ichida ikki baravar oshib, 100 manatga (5 dollar) yetgan. Talabalar formasi esa oilalarga taxminan 12 ming manatga (600 dollar) tushmoqda va ota-onalar farzandlarining oʻqishini toʻlash uchun kredit olishga majbur boʻlmoqda.