Бердимуҳамедовларнинг сурати туширилган газеталарни ўқишдан бошқа мақсадда фойдаланиш тақиқланди

Туркманистонда мамлакат президенти ҳамда унинг оила аъзолари тасвирланган газета-журналларни турли мақсадларда ишлатиб, уларни ифлослантирмаслик ҳақида давлат амалдорларидан ёзма мажбуриятнома олинмоқда. Бу ҳақда шундай ҳужжатга имзо чеккан бир қанча давлат мулозимларига таяниб, "Озодлик радиоси"нинг туркман хизмати хабар берди.

Жаҳон

30.01.2025, 14:05

Lotinchada

Улашиш:

Berdimuhamedovlarning surati tushirilgan gazetalarni oʻqishdan boshqa maqsadlarda foydalanish taqiqlandi

Унда айтилишича, Бердимуҳамедовлар тасвири туширилган газеталардан ҳожатхона қоғози сифатида фойдаланиш, олов ёқишда ишлатиш ҳамда нарсаларни ўрашда қўллаш тақиқланган. Бунинг учун эса давлат ходимларидан мажбурий тарзда "ҳукмрон oilaning фотосурати тасвирланган газета ва журнал саҳифаларини эҳтиёт қилиш” тўғрисида ёзма ваъдалар олинмоқда.

Шундоқ ҳам Туркманистонда қаттиқ назорат қилиниб, цензура остида юритиладиган газеталар орқали кам янгиликларни ўқиш мумкин. Давлат хизматчилари ва талабаларнинг ҳукумат қўл остида чоп этиладиган газеталарга мажбурий тарзда обуна қилиниши эса матбуотнинг эркин эмаслигидан дарак беради.

Ғарбий Болқон вилоятида "Озодлик радиоси"нинг туркман хизмати билан боғланган давлат хизматчисига кўра, унинг шаҳридаги расмийларга шу йилнинг бошидан бери президент сурати туширилган газеталарни ифлослантирмаслик доимий равишда айтиб келинган.

Бунинг устидан назорат қилиш учун расмийлар газеталарнинг ҳар бир саҳифасида QR кодлари чоп этишни режалаштирмоқда. Бошқа давлат хизматчисининг сўзларига кўра, бу уларга кирланган саҳифаларни кузатишга имкон беради.

"Биз энди ҳатто болаларнинг уйда газеталарга тегишидан қўрқамиз. Агар кичкина бола президентнинг фотосуратини йиртса ёки бузса, биз иш жойимиздан айрилишимиз мумкин", дейди у.

Кўпчиликка маълумки, Чегара билмас мухбирлар ташкилоти томонидан Туркманистонда матбуот эркинлиги доимий равишда паст баҳоланиб келинган. Ташкилотга кўра, журналистикаси фақат давлат тизимини мақташдан иборат бўлган Туркманистонда мустақил оммавий ахборот воситалари мавжуд эмас.

"Ҳукуматдан норози бўлганлар тўхтовсиз равишда таъқиб қилиниб, калтакланилмоқда, қийноққа солинмоқда, қамоққа олиниш ва ҳатто ўлдириш билан қўрқитилмоқда. Бундан одамларнинг кўпчилиги чет элга чиқиб кетган", дейилади хабарда.

Жаҳон

30.01.2025, 14:05

Улашиш:

#Туркманистон #матбуот

мавзуга оид янгиликлар