Blogerlar yana fuqarolar toʻgʻrisidagi qonunni buzganlikda ayblanmoqda

Raqobat qoʻmitasining xabar berishicha, bloger A.Abdurahmonov va O. Joʻrayev oʻzlariga tegishli ijtimoiy tarmoqlarda “ADWORLD GROUP” MChJ faoliyatini targʻib qilgan. Ular fuqarolarga konsalting deb emas, xorijga ishlash uchun yuborish boʻyicha shugʻullanib kelayotganligini reklama qilgani aniqlandi.

“Xususiy bandlik agentliklari toʻgʻrisida”gi  Qonunning 13-moddasiga muvofiq, xususiy bandlik agentliklarining Oʻzbekiston Respublikasidan tashqaridagi ishni qidirayotgan shaxslarni ishga joylashtirish boʻyicha xizmatlari ularda Oʻzbekiston Respublikasidan tashqaridagi ishni qidirayotgan shaxslarni ishga joylashtirish boʻyicha faoliyatni amalga oshirish uchun litsenziya mavjud boʻlgan taqdirda taqdim etilishi belgilangan.

Bunda, tegishli litsenziyasiz xorijda ishga joylashtirish boʻyicha faoliyatni amalga oshirish taqiqlanadi.

Shuningdek, “Reklama toʻgʻrisida”gi Qonunning 16-moddasida ishlab chiqarilishi va (yoki) realizatsiya qilinishi uchun tegishli sertifikatlari va litsenziyalari, majburiy sertifikatlashtirish guvohnomalari yoki maxsus ruxsatnomalari mavjud boʻlmagan tovarlarni reklama qilish taqiqlangan.

“Yuqoridagi holatlar yuzasidan ijtimoiy tarmoqlarda oʻz bloglarini yurituvchi fuqarolar O.Joʻrayev va A.Abduraxmonovlarga nisbatan qonun buzilish holati boʻyicha maʼmuriy huquqbuzarlik toʻgʻrisidagi bayonnomalar rasmiylashtirilib, sudga yuborildi”, — deyiladi qoʻmita xabarida.