Toshkentda noqonuniy boshlangan qurilish tuproq oʻpirilishiga olib keldi

Toshkentda noqonuniy boshlangan koʻp qavatli uy qurilishi sabab aholi uylaridan bir necha metr masofada tuproq oʻpirilishi roʻy berdi.

Voqea Yakkasaroy tumani Salar koʻchasida, Dilbuloq mahallasidagi koʻp qavatli uylar hududida sodir boʻlgan.

Qurilish inspeksiyasining maʼlum qilishicha, bu yerdagi qurilish ishlari “Lyuks Loyiha” MChJ tomonidan ishlab chiqilgan loyiha hujjatlari asosida amalga oshirilmoqda. Loyiha uchun “Arxitektura va shaharsozlik kengashi” ishchi organi hamda “Shaharsozlik hujjatlari ekspertizasi” DUKning ijobiy xulosalari olingan.

Qurilish obʼektining A bloki Toshkent shahar Qurilish va uy-joy kommunal xoʻjaligi sohasida hududiy nazorat qilish inspeksiyasidan belgilangan tartibda roʻyxatdan oʻtgan. Shu kunga qadar inspeksiya tomonidan obʼektda 10 marta monitoring oʻtkazilib, 11 ta yozma koʻrsatma berilgan. Shuningdek, qurilish meʼyor va qoidalariga rioya qilinmagani sababli buyurtmachi ikki marotaba maʼmuriy javobgarlikka tortilgan.

Biroq, loyihaning G4 bloki boʻyicha vaziyat boshqacha. Bu blok “Arxitektura va shaharsozlik kengashi”dan ijobiy xulosa olgan boʻlsa-da, “Shaharsozlik hujjatlari ekspertizasi” DUKdan xulosa olinmagan. Shu bois mazkur blok inspeksiyada roʻyxatdan oʻtmagan va qurilish ishlari noqonuniy boshlangani aniqlandi. Holat yuzasidan inspeksiya tomonidan tegishli tartibda huquqni muhofaza qiluvchi organlarga maʼlumot berilgan.

Shuningdek, oʻrganish jarayonida buyurtmachi “O‘zkommaishiysavdo” MChJ tomonidan G4 blok uchun kotlovan qazish ishlari olib borilayotganda hududdagi elektr transformatorida nosozlik yuzaga kelgani aniqlangan. Shu sababli kotlovandagi sizot suvlarini chiqarish imkoni boʻlmagan, natijada suv darajasi koʻtarilib ketgan. Buning oqibatida qoʻshni “Grand Capital” MChJ tomonidan ilgari qurilgan yerosti avtomashina turar joyining qayta koʻmilgan joylarida tuproq siljishi yuz berib, sirpanishga sabab boʻlgan.