Elektromobillarning "umri" qisqami?

Ma’lumotlarga ko‘ra, 2025 yil davomida Xitoy bozorida 230 dan ortiq yangi elektromobil modeli taqdim etilgan. 2026 yilning faqat mart oyida esa qariyb 80 ta taqdimot o‘tkazilib, 60 dan ortiq yangi model savdoga chiqarilgan.

Bugungi kunda tashqi dizaynni yarim yilda bir marta, yangi avlod modelini esa bir yilda bir marta chiqarish avtomobil sanoatida oddiy holga aylangan.

Bu jarayon elektromobillarning qayta sotish qiymatiga ham ta’sir qilmoqda. Uch-to‘rt yil avval ishlab chiqarilgan ko‘plab elektromobillar yangi dasturiy ta’minotni qo‘llab-quvvatlay olmaydi. Shu bois ular ikkilamchi bozorda tezroq qadrsizlanadi.

Xitoy avtomobil savdo assotsiatsiyasi ma’lumotlariga ko‘ra, dastlabki avlod elektromobillarining uch yillik qoldiq qiymati ayrim hollarda 40 foizdan ham pastga tushgan. Ichdan yonuv dvigatelli avtomobillarda esa bu ko‘rsatkich o‘rtacha 60 foiz atrofida saqlanib qoladi.

Elektromobil egalari o‘rtacha 3–5 yilda avtomobilini yangilashga harakat qiladi. Buning asosiy sababi avtomobil sifati emas, balki elektromobillar dasturiy va texnik jihatdan tezroq eskiradigan raqamli qurilmaga aylanib borayotganidir.

Maftuna Baxtiyorova