Isroil hujumlari natijasida Gʻazoda bir sutkada 100 falastinlik halok boʻldi

Isroilning Gʻazoda davom etayotgan havo hujumlari natijasida oxirgi bir sutka ichida 100 nafar inson halok boʻldi, yana 382 kishi tan jarohati oldi. Bu haqda Gʻazodagi Falastin sogʻliqni saqlash vazirligi maʼlum qildi.

Maʼlumotlarga koʻra, 2023 yil 7 oktabrdan buyon halok boʻlganlar soni 59 921 nafarga, yaralanganlar soni esa 145 233 nafarga yetdi.

Bayonotda qayd etilishicha, 2024 yil 18 mart kuni 19 yanvarda erishilgan oʻt ochishni toʻxtatish kelishuvi buzilganidan beri 8 755 falastinlik halok boʻlgan, 33 192 kishi yaralangan.

Haligacha minglab jasadlar vayronalar ostida qolmoqda.

Bundan tashqari, Isroil va AQSh tomonidan muvofiqlashtirilgan insonparvarlik yordami tarqatiladigan hududlarga qilingan tizimli hujumlar natijasida, 27 maydan buyon 1 157 nafar odam halok boʻldi, 7 758 kishi yaralandi. Faqatgina soʻnggi bir sutkada ushbu hududlarda 25 falastinlik halok boʻlgan, 237 nafar odam yaralandi.

Hisobotda aytilishicha, qamal ostidagi Gazoda ochlik tufayli soʻnggi 24 soat ichida yana 14 kishi, jumladan bir bola vafot etgan. Ochlik qurbonlarining umumiy soni 147 nafarga yetdi, ularning 88 nafari bolalar.