AQSH Eron portlariga blokada joriy etdi

AQSH va Eron o‘rtasida keskinlik yana kuchaydi. Vashington Eron portlariga qaratilgan dengiz blokadasini tikladi. Bu harakatlar esa ikki tomon o‘rtasidagi vaqtinchalik tinchlik kelishuvi barbod bo‘lganini ko‘rsatmoqda.

AQSH harbiylari 14-iyul kuni soat 20:00 dan boshlab Eron portlari va uning qirg‘oq hududlarida kirayotgan hamda chiqayotgan kemalarga blokada joriy etilganini ma’lum qildi.

Shuningdek, AQSH Markaziy qo‘mondonligining (CENTCOM) bildirishicha, Eronga qarshi yangi havo hujumlari boshlangan.

So‘nggi zarbalar Eronning Hormuz bo‘g‘ozidagi tijorat kemalariga hujum qilish salohiyatini pasaytirishga qaratilgan.

14-iyul kuni Eron OAV AQSH Abadon shahri, Mahshahr porti, Qeshm va Kish orollariga zarba berganini ma’lum qilgan.

CENTCOM 13-iyul oqshomida ham Eron bo‘ylab keng ko‘lamli hujumlar uyushtirib, Bushehr va Bandar-Abbos shaharlarini nishonga olgan edi.

Eron bunga javoban Hormuz bo‘g‘ozining Ummon suvlarida ikkita kemaga zarba berdi. Hujum oqibatida ekipaj a’zolaridan biri halok bo‘lgan. Eron seshanba kuni Quvayt, Bahrayn va Iordaniyaga ham javob zarbalari yo‘lladi.

Mojaroning yangi bosqichi

Eron Islom inqilobi qo‘riqchilari korpusi seshanba kuni ikkita supertankerga zarba berganini tan oldi. Ularning ta’kidlashicha, kemalar bir necha bor ogohlantirilganiga qaramay, harakatni davom ettirgan va natijada kuch bilan to‘xtatilgan.

Eron Iordaniyadagi Amerika harbiy obyektlariga ham zarba berganini da’vo qildi. AQSH harbiy-dengiz bazasi joylashgan Bahrayn esa Eronning havo hujumini qaytardi.

Keskinlik fonida Donald Tramp avvalroq e’lon qilgan Hormuz bo‘g‘ozi orqali o‘tuvchi kemalarga 20 foizlik yig‘im joriy etish rejasidan voz kechganini aytdi. Uning o‘rniga Fors ko‘rfazi davlatlari bilan savdo va investitsiya bitimlari tuzilishini ma’lum qildi.

“Birinchi bo‘lib ular o‘q uzdi”

Oq uyda so‘zga chiqqan Tramp 7-iyuldan qayta boshlangan harbiy keskinlik uchun Eronni aybladi.

“Birinchi o‘q uzgan ular. Bu juda katta xato bo‘ldi, chunki biz ularga qaqshatqich zarbalar bermoqdamiz. Ular bilan ishlash juda qiyin”, — dedi Tramp.

Donald Tramp o‘tgan hafta 17-iyunda imzolangan AQSH–Eron memorandumi amalda tugaganini aytib, AQSH Eronga qarshi harbiy amaliyotlarni qayta boshlaganini Kongressga rasman bildirgan edi.

Eron tashqi ishlar vaziri o‘rinbosari Kazem G‘aribobodiy davlat OAVga bergan intervyusida AQSH memorandumni buzib, undagi barcha majburiyatlarini poymol qilganini ta’kidladi.

Eron endilikda memorandum bo‘yicha, ayniqsa Hormuz bo‘g‘oziga oid hech qanday majburiyatga ega emas. Uning so‘zlariga ko‘ra, AQSH blokada orqali Tehronni muzokaralarga qaytaraman deb o‘ylasa, qattiq adashadi.