Rossiya Ukraina temiryo‘l va port inshootlariga, Ukraina esa Rossiya neft markazi va omboriga hujum qildi

Rossiya kuchlari Ukrainaning Dunay daryosi bo‘yida joylashgan Izmail portidagi temiryo‘l vokzaliga va Nikolayev yaqinidagi ikkita kemaga zarba berganini ma’lum qildi.

Shu vaqtda Ukraina dronlari Rossiya hududidagi nishonlarga, jumladan, Boltiqbo‘yi neft eksporti markazi va Moskva yaqinidagi omborga hujum qilgan.

Rossiya Mudofaa vazirligi 14-avgust kuni Izmaildagi temiryo‘l vokzalidan Ukraina harbiy yuklar va yoqilg‘i yuklash, saqlash hamda tashishda foydalanganini bildirgan.

Ukraina dronlari Ust-Luga va Tverni nishonga oldi

Moskva rasmiylari Ukraina dronlar hujumi Leningrad viloyatidagi Boltiq dengizining yirik neft eksport porti sanalgan Ust-Lugada yong‘in keltirib chiqarganini ma’lum qildi.

Viloyat gubernatori Aleksandr Drozdenkoning so‘zlariga ko‘ra, yong‘in bartaraf etilgan va hech kim jabrlanmagan. Bir kechada Sankt-Peterburg atrofidagi hududda 50 dan ortiq dron urib tushirilgan.

Ukraina Moskvaning harbiy va iqtisodiy xarajatlarini oshirish maqsadida Rossiyaning neftni qayta ishlash zavodlari, portlari va energetika infratuzilmasini nishonga olmoqda. Rossiyaning o‘ndan ortiq yirik neftni qayta ishlash zavodiga zarba berilishi mamlakatda yoqilg‘i tanqisligi kuchaytirdi.

So‘nggi bir oy ichida “Wildberries” onlayn-riteyleriga tegishli obyektlarga 20 martadan ortiq zarba berilgan.

TASS axborot agentligining xabar berishicha, dronlar faolligi sababli Rossiya Federal havo transporti agentligi (“Rosaviatsiya”) parvozlar xavfsizligini ta’minlash maqsadida Moskvadagi barcha aeroportlarda parvozlarni vaqtincha cheklagan.

Dronlar xavfi Boltiqbo‘yiga ham yoyildi

Tungi dronlar faollashuvi Boltiqbo‘yi mintaqasining boshqa hududlarida ham mudofaa choralarini ko‘rishga sabab bo‘ldi.

Latviya qurolli kuchlari mamlakat havo hududiga kirgan dron qiruvchi samolyotlar tomonidan urib tushirilganini ma’lum qildi. 

Ayni paytda, Finlandiya dronlar bilan bog‘liq ehtimoliy hodisalarning oldini olish uchun ehtiyot chorasi sifatida Boltiq dengizining ayrim qismlarida kemalar harakatini vaqtincha chekladi.