Rossiya jang maydonida g‘alaba qozonmoqda va “terrorchilar” bilan muzokara o‘tkazmaydi – Putin

2-sentabr kuni prezident Putin so‘nggi haftalardagi Ukrainaning Rossiya hududiga qilgan hujumlari jiddiy zarar yetkazganini, dronlar katta muammo tug‘dirayotganini qayd etdi.

Biroq u jurnalistlarga, Rossiya jang maydonida oldinga siljiyotganini aytib, "Dushman tor-mor bo‘lishiga shubham yo‘q", dedi.

Ammo bunga qachon erishish mumkinligini aytmadi. Rossiya yangi harbiy safarbarlik e’lon qilishga majburligi haqidagi mish-mishlarni esa “safsata” deb atadi Putin.

“Rossiya ilgarilamoqda”

Urush boshlanganiga to‘rt yarim yil to‘ldi. Rossiya Ukraina hududining qariyb beshdan bir qismini nazorat qilmoqda. AQSH vositachiligidagi tinchlik muzokaralari AQSH va Isroil Eron bilan urushga kirishganidan so‘ng, fevral oyida to‘xtab qoldi.

Jamoatchilik fikri so‘rovlari Rossiyada urushdan charchash kuchayib borayotganini ko‘rsatmoqda. Nufuzli shaxslar esa Rossiya iqtisodiyotiga tushayotgan bosim haqida ogohlantirmoqda.

Biroq Putinning so‘zlariga ko‘ra, avgustda rus qo‘shinlari Donetsk viloyatida 270 kvadrat kilometr hududni egallagan. Shuningdek, Ukraina qo‘shinlarining biri 4 500–4 800 nafar, ikkinchisi esa 2 000 nafargacha askardan iborat ikki yirik guruhi qurshab olingan. Ammo bu hodisalar xalqaro OAVlarida tasdiqlanmagan.

Putin Volodimir Zelenskiyning ukrain dronlari Rossiya havo hududini amalda yopib qo‘yishi haqidagi aviakompaniyalarga qilgan ogohlantirishi “davlat terrorizmi”ga o‘xshashini, agar shunday bo‘lsa, Moskva bunga javob qaytarish yo‘lini topishini bildirdi. Qirg‘izistondagi sammitdan keyin matbuot anjumanida so‘zlagan Putin “terrorchilar” bilan muzokara olib borishning imkoni yo‘qligini aytdi.

Putin Moskva urushni muzlatib qo‘yish emas, balki uni tugatishga qaratilgan muzokaralarga ochiq ekanini va AQSH prezidenti Donald Trampning vakillari bilan muzokara olib borishga tayyorligini yana bir bor ta’kidladi.

Putin ukrain dronlari Rossiya neftni qayta ishlash zavodlariga zarar yetkazganini tan oldi, biroq bu hujumlar natijasida yuzaga kelgan keng ko‘lamli yoqilg‘i taqchilligini tilga olmadi.

Biroq uning aytishicha, neftni qayta ishlash zavodlarini himoya qilish yaxshilangan va atigi 10 foiz ta’mirlanishi kerak bo‘lgan zavodlar qolgan.