AQSh xorijlik talabalarning ish vizasi uchun 100 ming dollar talab qildi

AQSh Milliy xavfsizlik vazirligi xorijlik talabalar uchun mamlakatda ishlash imkonini beruvchi Optional Practical Training (OPT) dasturiga yangi to‘lovlar joriy etishni taklif qildi. Bu haqda Reuters xabar berdi.

Taklifga ko‘ra, F-1 vizasidagi talaba uchun OPT dasturidagi dastlabki amaliyotga ruxsat berish uchun $70 ming, keyingi qo‘shimcha amaliyot davri uchun esa $30 ming to‘lov olinishi mumkin. Shu tariqa umumiy xarajat $100 minggacha yetadi.

Amaldagi to‘lov taxminan $500ni tashkil etadi.

OPT dasturi xorijlik talabalarga o‘qish vaqtida haftasiga 20 soatgacha, shuningdek, o‘qishni tugatgandan keyin ma’lum muddat davomida o‘z mutaxassisligi bo‘yicha amaliyot o‘tash va ishlash imkonini beradi. STEM — fan, texnologiya, muhandislik va matematika yo‘nalishlari bitiruvchilari uchun qo‘shimcha muddat ham mavjud.

Vazirlik yangi to‘lovlar firibgarlikka qarshi kurashish, immigratsiya tizimi yaxlitligini mustahkamlash va amerikalik ishchilar manfaatlarini himoya qilishga qaratilganini bildirdi.

Taklif jamoatchilik muhokamasiga 30 kun davomida taqdim etiladi. Qoidalar yakuniy tasdiqlangan taqdirda, ularni kuchga kiritishdan oldin yana 60 kunlik tayyorgarlik muddati berilishi rejalashtirilgan.