BMT: Yaqin Sharqdagi urush tufayli yana 32 million odam qashshoqlashadi

Garchi asosiy talafot mojarodan bevosita jabr ko‘rgan va import qilinadigan energiyaga qaram bo‘lgan mamlakatlarga to‘g‘ri kelsa-da, tadqiqot natijalari jangovar harakatlardan yiroqda joylashgan kambag‘al davlatlarga ham jiddiy va uzoq muddatli zarar yetishini ko‘rsatmoqda.

Vaqtinchalik sulhga qaramay, mojaroning ta’siri “keskin” bosqichdan “davomli” bosqichga o‘tmoqda. Bu bosqich qancha uzoq davom etsa, kambag‘al mamlakatlarning qashshoqlikka yuz tutishi xavfi shunchalik ortadi. Eng yomon ssenariyda esa yana 32 million kishi qashshoqlik domiga tushishi mumkin.

Hisobotda ta’kidlanishicha, ayniqsa, Fors ko‘rfazi, Osiyo, Sahroyi Kabirdan janubdagi Afrika davlatlari hamda rivojlanayotgan kichik orol-davlatlar zaif hisoblanadi.

“Urush – bu taraqqiyotning aksi. Ziddiyat mamlakatlarning yillar davomida bunyod etganini bir necha hafta ichida yo‘qqa chiqarishi mumkin. Yangi tahlil Yaqin Sharqdagi mojaro keskinlashuvining ziyoni bevosita jabr ko‘rgan mamlakatlar bilan cheklanib qolmay, balki energiya va oziq-ovqat narxlarining ko‘tarilishiga moslashish uchun moliyaviy imkoniyatlari cheklangan davlatlarga ham qimmatga tushayotganini ko‘rsatmoqda. Ular bugungi narxlarni barqarorlashtirish hamda kelajakdagi sog‘liqni saqlash, ta’lim va ish o‘rinlarini moliyalashtirish o‘rtasida imkonsiz tanlov qilishga majbur bo‘lishadi. Buning oldini olishda o‘z vaqtida ko‘rilgan siyosiy choralar ahamiyatli.” – dedi BMTTD ma’muri va BMT Bosh kotibining o‘rinbosari Aleksandr De Kroo. 

 

BMTTD har bir ehtimoliy ssenariy uchun mojaro oqibatlarini yumshatishga qaratilgan aniq siyosiy choralarni taklif qilmoqda.

Asosiy tavsiya – kambag‘al va ijtimoiy himoyaga muhtoj qatlamlarni qo‘llab-quvvatlash uchun maqsadli va vaqtinchalik pul yordamlarini joriy etish. 

Hisob-kitoblarga ko‘ra, vaziyatga qarab, bu chorani samarali amalga oshirish uchun 6 milliard dollargacha mablag‘ zarur bo‘ladi.