Isroil Gʻazoda oziq-ovqat kutayotgan falastinliklar hamda tinch aholini oʻldirdi

Gʻazoda vaziyat kundan-kunga ogʻirlashib borar ekan, AQSh va Isroil yetakchilari ehtimoliy oʻt ochishni toʻxtatish kelishuvini muhokama qilmoqda. Shu bilan birga, xalqaro hamjamiyat urushni toʻxtatishga chaqirmoqda.

"Al Jazeera" telekanali muxbiri Muas al-Kahlutning Gʻazo shahridan bergan maʼlumotlariga koʻra, Isroil zarbalaridan soʻng al-Ahli kasalxonasiga oʻnlab yaradorlar olib kelingan.

"Bu yerda juda koʻp yarador tinch aholi vakillari bor, ularning orasida bolalar ham talay. Kasalxona imkoniyatlari yetarli emas, joy va tibbiy vositalar tanqisligi sababli koʻpchilik bemorlar yerda yotishiga majbur", — dedi al-Kahlut.

Isroil armiyasi Gʻazo shahri sharqida yashovchilarga janubga koʻchishni buyuruvchi varaqalarni tashlagan. Muxbirning aytishicha, bunday varaqalardan soʻng odatda hududlar intensiv bombardimon qilinadi va natijada koʻplab qurbonlar boʻlayotgani kuzatilmoqda.

Yordam kutib oʻlganlar

Rafah shahri shimolida, tanqid ostida qolayotgan Gʻazo Gumanitar Fondi (GHF) tomonidan tashkil etilgan oziq-ovqat tarqatish punktlari yaqinida kamida besh nafar falastinlik oʻldirilgani haqida ham xabar berilmoqda.

Eslatib oʻtamiz, GHF may oyi oxirida AQSh va Isroil koʻmagida Gʻazoga cheklangan yordam yetkazishni boshlagan edi. Shundan buyon Isroil harbiylari ushbu tarqatish nuqtalari atrofida yordam kutayotgan fuqarolarga oʻq uzgani qayd etilgan. Gʻazo hukumati matbuot xizmatining maʼlumotiga koʻra, bu holatlarda 580 nafardan ortiq odam halok boʻlgan, 4 mingdan ortigʻi yaralangan.

Isroilning "Haaretz" nashrida chiqqan hisobotda esa ayrim isroillik askarlar ommaviy yordam oluvchilarga qarata oʻq uzish boʻyicha buyruq olganlarini tan olgani yozilgan.

"Yordam yetkazish bahonasida odam oʻldirish — tushunarsiz va fojiali"

Xalqaro jinoyat huquqi boʻyicha mutaxassis, huquqshunos Joffri Nays “Al Jazeera”ga bergan intervyusida GHF atrofidagi oʻlimlar haqida fikr bildirar ekan, bu holatlarni "tushunib boʻlmaydigan" deb atadi.

"Bu tashkilot yordam koʻrsatish uchun tashkil etilgan boʻlsa-da, aynan uning faoliyati atrofida yuzlab odamlar oʻldirilmoqda. Bu tashqaridan qaraganda mutlaqo aql bovar qilmas holat", — dedi Nays.