Telegram asoschisi nega qamaldi?

Durov 24 avgust kuni Fransiyaning “Le Burje” ayeroportida qoʻlga olindi. Uning hibsga olinishi, dunyo miqyosida katta muhokamalarga sabab boʻldi.
Maʼlum boʻlishicha, Fransuz tergovchilari Durovga firibgarlik, narkotik moddalar savdosi, uyushgan jinoyatchilik, terrorizmni targʻib qilish va kiberhujumlar bilan bogʻliq ayblovlar boʻyicha hibsga olinishiga order bergan. Aniqroq qilib aytadigan boʻlsak, Durov oʻz platformasidan jinoyat maqsadlarida foydalanishni cheklash boʻyicha chora-tadbirlar koʻrmaganlikda ayblangan hamda 24 avgust kuni shanba oqshomida Bakudan Parijga oʻzining shaxsiy samolyotida kelganidan soʻng hibsga olingan. Durovni hibsda saqlanish muddati esa 96 soatga choʻzilgan. Hozirda sudya mahbusning taqdiri boʻyicha qaror qabul qilishi kutilmoqda.

Telegramning javobi va Durovning himoyasi 

"Telegram Yevropa Ittifoqi qonunlariga, shu jumladan, Raqamli xizmatlar toʻgʻrisidagi qonunga rioya qiladi — uning moderatsiyasi sanoat standartlariga mos va doimiy ravishda takomillashib bormoqda." 
"Telegram bosh direktori Pavel Durov yashirishga hech narsasi yoʻq va Yevropada tez-tez sayohat qiladi. Platforma yoki uning egasi platformada sodir boʻlgan suiisteʼmolliklar uchun javobgar deb daʼvo qilish — absurd. Biz bu vaziyatning tezda hal qilinishini kutmoqdamiz", deyiladi Telegram bayonotida. 
Bundan tashqari, Rossiya hukumati Fransiyani  hamkorlikdan bosh tortganlikda  aybladi. Parijdagi Rossiya elchixonasi Durov bilan uchrashishga ruxsat soʻragan. Ammo  Fransiya hozirgacha bu vaziyatda aloqaga kirishishdan qochayotganini bildirilgan.

Pavel Durovning Rossiyadan qochishi 

Durov 2014 yilda VKontakte ijtimoiy tarmogʻini yopish toʻgʻrisida Kreml talablariga boʻysunishdan bosh tortganidan keyin Rossiyani tark etgan edi. U Kreml bilan bogʻliq ziddiyatdan soʻng VKni tark etdi va Telegram platformasiga eʼtibor qaratdi.

Shundan soʻng, u 2013 yilda ukasi Nikolay bilan birga ushbu platformani tashkil etgan. Dastlab, Telegram boshqa xabar almashish dasturlariga oʻxshash boʻlgan, ammo vaqt oʻtishi bilan ijtimoiy tarmoqqa aylanib borgan. 
Telegramda foydalanuvchilar bir-birlari bilan muloqot qilishdan tashqari, 200,000 kishigacha boʻlgan guruhlarga qoʻshilishlari va boshqalarni kuzatishi va fikr qoldirishi mumkin boʻlgan “kanallar” yaratildi. Shundan soʻng,  950 milliondan ortiq faol foydalanuvchilarga ega boʻlgan Telegram, Rossiyaning Ukrainaga bostirib kirishi toʻgʻrisida axborot va dezinformatsiya – tarqatishning asosiy manbasiga aylangan va davlat tomonidan etirozlarga sabab boʻlgan.

Durovning hozirgi hayoti va Telegram ning xavfsizlik siyosati 

Durov hozirda Dubayda yashaydi, Telegram bosh qarorgohi ham Dubayda joylashgan. U Fransiya va Birlashgan Arab Amirliklari (BAA) fuqaroligiga ega. Yaqinda u Berlin, London, Singapur va San-Fransiskoda yashashga harakat qilganini, lekin Dubayni tanlaganini aytgan. Chunki bu joyni u biznes muhiti va neytralligi uchun tanlaganini bildirgan.