Rossiya Armanistonni ogohlantirdi

Kremlning dushanba kuni ma’lum qilishicha, agar Armaniston Rossiya bilan integratsiyadan yuz o‘girsa, Rossiya gaziga to‘layotgan “jozibali” narxdan ayrilishi mumkin.

Armaniston Rossiya boshchiligidagi iqtisodiy ittifoq a’zosi bo‘lib, energiya ta’minoti borasida Rossiyaga bog‘langan. 

Biroq, mamlakat so‘nggi yillarda Yevropa Ittifoqi bilan yaqinroq aloqalar o‘rnatishga, jumladan, blokka qo‘shilish jarayonini boshlash to‘g‘risidagi qonunni qabul qilishga intilmoqda.

“Rossiya gazi uchun juda va juda jozibador hamda imtiyozli narx belgilangan. Ammo, albatta, bunday shartlar boshqa integratsion tuzilmalar ishtirokchilari uchun amal qilmaydi. Ularda narx siyosati butunlay boshqacha, ya’ni bozorga asoslangan”, – dedi Kreml matbuot kotibi Dmitriy Peskov jurnalistlarning Armaniston bilan munosabatlar haqidagi savoliga javoban.

Armaniston tashqi ishlar vaziri Ararat Mirzoyan mamlakatining Rossiya bilan siyosiy va iqtisodiy aloqalarni uzishdan manfaatdor emasligini ta’kidladi.

“Biz o‘zaro normal munosabatlarimizni saqlab qolishni va chuqurlashtirishni istaymiz hamda shunga intilamiz”, – degan u dushanba kuni Yerevanda jurnalistlarga.

Avvalroq Yerevandagi Yevropa siyosiy hamjamiyati uchrashuvining Markaziy Osiyoga ta'siri haqida maqola e'lon qilgandik.