Россия Арманистонни огоҳлантирди

Кремлнинг душанба куни маълум қилишича, агар Арманистон Россия билан интеграциядан юз ўгирса, Россия газига тўлаётган “жозибали” нархдан айрилиши мумкин.

Арманистон Россия бошчилигидаги иқтисодий иттифоқ аъзоси бўлиб, энергия таъминоти борасида Россияга боғланган. 

Бироқ, мамлакат сўнгги йилларда Европа Иттифоқи билан яқинроқ алоқалар ўрнатишга, жумладан, блокка қўшилиш жараёнини бошлаш тўғрисидаги қонунни қабул қилишга интилмоқда.

“Россия гази учун жуда ва жуда жозибадор ҳамда имтиёзли нарх белгиланган. Аммо, албатта, бундай шартлар бошқа интеграцион тузилмалар иштирокчилари учун амал қилмайди. Уларда нарх сиёсати бутунлай бошқача, яъни бозорга асосланган”, – деди Кремль матбуот котиби Дмитрий Песков журналистларнинг Арманистон билан муносабатлар ҳақидаги саволига жавобан.

Арманистон ташқи ишлар вазири Арарат Мирзоян мамлакатининг Россия билан сиёсий ва иқтисодий алоқаларни узишдан манфаатдор эмаслигини таъкидлади.

“Биз ўзаро нормал муносабатларимизни сақлаб қолишни ва чуқурлаштиришни истаймиз ҳамда шунга интиламиз”, – деган у душанба куни Ереванда журналистларга.

Аввалроқ Еревандаги Европа сиёсий ҳамжамияти учрашувининг Марказий Осиёга таъсири ҳақида мақола эълон қилгандик.