Navoiyda havo ifloslanishi bilan bogʻliq holat oʻrganildi

Navoiy viloyatida atmosfera havosi ifloslanganligi bilan bogʻliq holat viloyat Ekologiya boshqarmasi tomonidan oʻrganildi.

Oʻrganish davomida 19-iyul kuni ertalab tongi vaqti 7:00 dan 9:00 ga qadar Navoiy viloyati Ekologiya boshqarmasining tahliliy laboratoriyasi hamda “Navoiyazot” AJga qarashli Sanitar laboratoriyasi bilan korxona atrofida tahlil ishlari olib borildi va atmosfera havosi tarkibi EKOLAB (Gazoanalizator) apparati yordamida oʻrganildi.

Oʻrganish natijasida “Navoiyazot” AJ va BXO atrofidan tahlil ishlari olib borilganda atmosfera tarkibida ammiak 1,4 barobar hamda vodorod sulfidi 16,8 barobar meʼyordan yuqoriligi aniqlandi.

Bundan tashqari, Navoiy viloyati Gidrometeorologiya boshqarmasi  laboratoriyasi tomonidan olingan tahlillar natijasiga koʻra 1-kuzatuv posti (Zulfiya koʻchasi)da uglerod ikki oksidi 1,04, ammiak 1,1 barobar, 2-kuzatuv posti (Meʼmorlar koʻchasi)da esa ammiak 1,2 barobar yuqoriligi maʼlum boʻldi.

Hozirda “Navoiyazot” korxonasi hududida tekshiruv oʻtkazish va yoʻl qoʻyilayotgan kamchiliklarga aniqlik kiritish uchun hujjatlar tayyorlanmoqda.