O‘zbekistonda maktab va oliy ta’lim yagona vazirlikka birlashtirildi

O‘zbekistonda Maktabgacha va maktab ta’limi vazirligi hamda Oliy ta’lim, fan va innovatsiyalar vazirligi negizida yangi Ta’lim va fan vazirligi tashkil etildi.

Tegishli farmonni Prezident Shavkat Mirziyoyev imzoladi.

Islohotdan ko‘zlangan asosiy maqsad ta’lim, tarbiya va ilm-fanning yagona tizimini shakllantirishdan iborat. Yangi vazirlik ta’lim muassasalari faoliyatini tashkil etish, ushbu sohada talablarni belgilash, shuningdek, akkreditatsiya va litsenziyalash masalalariga mas’ul bo‘ladi.

Yagona boshqaruv tizimi ta’limning turli bosqichlari o‘rtasidagi uzviylikni ta’minlash va ta’lim sifatini oshirishga qaratilgan.

Islohot doirasida oliy ta’lim sohasida davlat aralashuvini kamaytirish, universitetlarning mustaqilligini kengaytirish va nodavlat ta’lim sektorini rivojlantirish uchun sharoit yaratish ham ko‘zda tutilgan.

Vazirliklarning birlashtirilishi munosabati bilan Oliy ta’lim, fan va innovatsiyalar vaziri Qo‘ng‘irotboy Sharipov hamda Maktabgacha va maktab ta’limi vaziri E’zozxon Karimova lavozimidan ozod etildi.