Afgʻoniston tadbirkorlarining Oʻzbekiston vizasi olishi yengillashtiriladi

Suhbat chogʻida ikki davlat oʻrtasidagi savdo-iqtisodiy munosabatlarni yanada kengaytirish, xususiy sektorlar aloqalarini mustahkamlash va oʻzaro investitsiyalarni ragʻbatlantirish masalalari muhokama qilindi.

Uchrashuvda quyidagi tashabbuslar ilgari surildi:

har chorakda Toshkent, Qobul, Termiz va Balx shaharlarida B2B uchrashuvlar tashkil etish;

Toshkent shahrida ACCI vakolatxonasini ochish orqali investitsion aloqalarni faollashtirish;

Afgʻoniston tadbirkorlari uchun biznes vizalarini rasmiylashtirish va taklifnoma olish jarayonlarini yengillashtirish;

Termiz porti orqali yuk tashish jarayonlarini tezlashtirish hamda bojxona tartib-taomillarini optimallashtirish;

har yili Qobul va Toshkent (yoki Mozori Sharif va Termiz) shaharlarida qoʻshma savdo koʻrgazmalarini oʻtkazish.

Tomonlar mazkur tashabbuslarni amalga oshirish ikki mamlakat oʻrtasidagi savdo hajmini oshirish, yangi investitsiya loyihalarini yoʻlga qoʻyish va xususiy sektor hamkorligini kuchaytirishga xizmat qilishini taʼkidladilar.

Uchrashuv yakunida Davron Vahobov Afgʻoniston delegatsiyasining tashrifini Oʻzbekiston–Afgʻoniston iqtisodiy hamkorligida yangi bosqichni boshlab beruvchi muhim qadam sifatida baholadi.