Iyul oyi soʻnggi 150 yil ichidagi eng issiq oylardan biri boʻldi – mutaxassis

Oʻzbekistonning Samarqand, Termiz kabi yirik tayanch kuzatuv punktlarida iyul oyi oʻrtacha oylik havo harorati kuzatuvlar boshlangan davrdan boshlab eng yuqori qiymatga yetdi.

Bu haqda ob-havo kuzatuvlari boʻyicha mutaxassis Erkin Abdulahatov maʼlum qilmoqda.

Qayd etilishicha, Samarqand va Termizda oy davomidagi 3 ta issiq havo oqimi 2021 yildagi rekord darajadagi eng issiq oylardan kamida 0,2 daraja yuqori issiq boʻlishini taʼminlagan.

Fargʻona shahrida esa 2023 yildagi eng issiq iyul oyi (+29.8 daraja) joriy iyulda ham takrorlandi.

«Poytaxtda joriy iyul kuzatuvlar boshlangan 1868 yildan buyon ikkinchi eng issiq iyul boʻldi. Toshkentda 18 iyuldan 23 iyulga qadar muntazam har kuni maksimal havo harorati kunduz kunlari +42 daraja va undan biroz past kuzatildi. Oyning 4-sanasidagi +43,5 daraja issiq harorat poytaxtda oʻtgan oydagi eng yuqori qiymat boʻldi.

Iyul — shundoq ham respublikadagi eng issiq oy va u yaqin 1,5 asrdagi eng issiq iyul kabi oʻtganini aholi oʻz tanasida his qildi. Jazirama kunlar kishilar hafsalasini pir qildi. Uyqu, ovqatlanish rejimini buzib tashladi. Koʻpchilik bosh ogʻriq, kamquvvatlilik sabab, oʻziga yangi-yangi kasalliklarni (ayniqsa qon bosimi) orttirib oldi», – deb yozadi mutaxassis.

Maʼlum boʻlishicha, «Meteojurnal» Turkmaniston poytaxti Ashxabodda ham oʻtgan iyul oyi kuzatuvlar tarixidagi eng issiq oy boʻlganini eʼlon qilgan.