O‘zbekiston va Qirg‘iziston chegara hududlarini almashdi

Ikki mamlakat o‘rtasidagi chegarani demarkatsiya qilish doirasida O‘zbekistonning ikkita qishlog‘idagi 2 mingdan ortiq aholi Qirg‘iziston tarkibiga o‘tdi. 

Bu haqda 23-iyun kuni Qirg‘iziston prezidentining matbuot kotibi Asqat Alagozov Facebook ijtimoiy tarmog‘ida xabar berdi.

«Bugungi kunda O‘zbekiston Respublikasi bilan davlat chegarasini demarkatsiya qilish doirasida avval O‘zbekiston hududiga qarashli bo‘lgan ikkita aholi punkti o‘z aholisi (taxminan 2500 kishi) bilan birga Qirg‘iziston Respublikasi tarkibiga o‘tdi», — dedi matbuot kotibi.

Alagozovning so‘zlariga ko‘ra, gap avval Farg‘ona viloyati tarkibida bo‘lgan Cho‘ng‘ara va Tosh-Tobo qishloqlari haqida ketmoqda.

U qishloqlarda ro‘yxatga olish tadbirlari o‘tkazilishini va ular yakunlangach, aholiga Qirg‘iziston Respublikasi fuqaroligi berilishini ta’kidladi.

«Mazkur aholi punktlari evaziga Qirg‘iziston tomoni O‘zbekiston Respublikasiga chegara hududidan maydoni teng bo‘lgan yer uchastkalarini berdi», — deya aniqlik kiritdi Alagozov.

Bundan tashqari, matbuot kotibining xabar berishicha, tomonlar Qirg‘iziston Botken viloyat markazini Aydarken shahri bilan bog‘laydigan avtomobil yo‘li qismini qurishi uchun ham teng qiymatli yer uchastkalarini almashgan.