Ўзбекистон ва Қирғизистон чегара ҳудудларини алмашди

Икки мамлакат ўртасидаги чегарани демаркация қилиш доирасида Ўзбекистоннинг иккита қишлоғидаги 2 мингдан ортиқ аҳоли Қирғизистон таркибига ўтди. 

Бу ҳақда 23 июнь куни Қирғизистон президентининг матбуот котиби Асқат Алагозов Facebook ижтимоий тармоғида хабар берди.

«Бугунги кунда Ўзбекистон Республикаси билан давлат чегарасини демаркация қилиш доирасида аввал Ўзбекистон ҳудудига қарашли бўлган иккита аҳоли пункти ўз аҳолиси (тахминан 2500 киши) билан бирга Қирғизистон Республикаси таркибига ўтди», — деди матбуот котиби.

Алагозовнинг сўзларига кўра, гап аввал Фарғона вилояти таркибида бўлган Чўнғара ва Тош-Тобо қишлоқлари ҳақида кетмоқда.

У қишлоқларда рўйхатга олиш тадбирлари ўтказилишини ва улар якунлангач, аҳолига Қирғизистон Республикаси фуқаролиги берилишини таъкидлади.

«Мазкур аҳоли пунктлари эвазига Қирғизистон томони Ўзбекистон Республикасига чегара ҳудудидан майдони тенг бўлган ер участкаларини берди», — дея аниқлик киритди Алагозов.

Бундан ташқари, матбуот котибининг хабар беришича, томонлар Қирғизистон Боткен вилоят марказини Айдаркен шаҳри билан боғлайдиган автомобиль йўли қисмини қуриши учун ҳам тенг қийматли ер участкаларини алмашган.