Shavkat Mirziyoyevning Xitoyga rasmiy tashrifi yakunlandi

Davlat rahbari 31 avgust kuni rafiqasi bilan birga Tyanszin shahridagi “Meyszyan” kongress markazida Shanxay hamkorlik tashkiloti sammitining norasmiy tadbirlarida ishtirok etdi.

Oʻzbekiston yetakchisi 1 sentabr kuni ShHT davlat rahbarlari kengashining navbatdagi yigʻilishi va “ShHT plyus” formatidagi uchrashuvda qatnashib, koʻp tomonlama hamkorlikni yanada mustahkamlash hamda tashkilot faoliyatini takomillashtirish boʻyicha qator tashabbuslarni ilgari surdi.

2 sentabr kuni Pekin shahrida Xitoy Xalq Respublikasi raisi Si Szinpin bilan rasmiy delegatsiyalar ishtirokida muzokaralar boʻlib oʻtdi. Uchrashuv yakunida amaliy hamkorlikning ustuvor yoʻnalishlari boʻyicha ikki tomonlama hujjatlarning salmoqli toʻplami imzolandi.

Shuningdek, Shavkat Mirziyoyev Rossiya prezidenti Vladimir Putin bilan uchrashib, ikki tomonlama hamkorlikning dolzarb masalalarini muhokama qildi.

Shu bilan bir qatorda Xitoy Bosh vaziri Li Syan, xorijiy delegatsiyalar rahbarlari va ishbilarmon doiralar vakillari bilan ham samarali uchrashuvlar oʻtkazdi.

Oʻzbekiston prezidenti 3 sentabr kuni Pekin shahrida Ikkinchi jahon urushi yakunlanganining 80 yilligi munosabati bilan oʻtkazilgan gʻalaba paradida ishtirok etdi.

Tashrif tadbirlari yakunlangach, Shavkat Mirziyoyev Toshkentga joʻnab ketdi. Oliy martabali mehmonlarni Xitoy rasmiylari kuzatib qoʻydi.