20 yillik mehnat stajiga ega ayollar uchun pensiya yoshini bir yilga qisqartirish taklif etilmoqda

Iqtisodiyot va moliya vazirligi “Davlat pensiya taʼminoti sohasida zamonaviy xizmatlarni joriy etish boʻyicha qoʻshimcha chora-tadbirlar toʻgʻrisida”gi qaror loyihasini jamoatchilik muhokamasiga taqdim etdi.

Loyihaga koʻra, joriy yil 1 iyundan boshlab qator pensiya xizmatlarini fuqarolarning alohida murojaatisiz, proaktiv shaklda amalga oshirish taklif qilinmoqda.

Jumladan:

• 20 yil mehnat stajiga ega ayollarga yoshga doir pensiya tayinlashda umumiy pensiya yoshini bir yilga kamaytirish;
• ish oʻrinlari qisqarishi, ish hajmining kamayishi yoki korxona tugatilishi sababli ishdan boʻshatilgan va ishsiz deb topilgan fuqarolarga belgilangan pensiya yoshidan ikki yil oldin pensiya tayinlash.

Shuningdek, 2027 yil 1 yanvardan boshlab Pensiya jamgʻarmasi fuqarolardan hujjat va maʼlumotlarni qogʻoz shaklida qabul qilishni toʻxtatishi rejalashtirilgan.

Qaror loyihasining jamoatchilik muhokamasi 26 fevralga qadar davom etadi.