Stokgolmda Isroilga qarshi norozilik aksiyasi boʻlib oʻtdi

Shvetsiya jurnalistlar federatsiyasi tashabbusi bilan oʻtkazilgan aksiya doirasida jurnalistlar Medborgarplatsen maydonida yigʻilib, avvalo “Al Jazeera” muxbiri Anas ash-Sharifni esladilar.

Jurnalistlar qoʻllarida “Genotsidni toʻxtating. Sukut oʻldiradi” va “Anas ash-Sharif — Gʻazoda Isroil tomonidan oʻldirilgan jurnalist” yozuvli plakatlar ushlab, “Biz falastinlik jurnalistlar bilan faxrlanamiz” va “Gʻazoda genotsid boʻlyapti; biz jim turmaymiz” deya shiorlarni baqirdilar.

Ishtirokchilarga “Jurnalistlarni oʻldirishni toʻxtating” yozuvli futbolkalar tarqatilib, Gʻazoda oʻldirilgan jurnalistlarga eʼtibor qaratish maqsad qilindi.

Aksiya davomida tarqatilgan bayonotda shunday deyiladi:

“Falastinlik jurnalistlar va OAV xodimlari qasddan oʻldirilmoqda. Buni amalga oshirayotgan Isroilga hech qanday sanksiya qoʻllanmayapti, jurnalistlarni oʻldirish jazosiz qolmoqda. Afsuski, dunyo bunga jim kuzatuvchi boʻlib turibdi, bu esa mutlaqo yoʻl qoʻyib boʻlmas holat. Isroil jurnalistlar oʻlimi uchun javob berishi lozim. Jurnalistlarni oʻldirish toʻxtatilishi shart”.