Toshkent temiryoʻl vokzaliga avtomobilda kirib-chiqish sharoiti yaratildi

“Toshkent-markaziy” temir yoʻl vokzalidan bir kunda 5 ming nafargacha yoʻlovchi foydalanadi. Shuni hisobga olib vokzal hududida avtomobillarning vokzalning kirish qismiga qadar kirib-chiqishi yoʻlga qoʻyildi. 

Shuningdek, vokzal atrofidagi temir panjarali toʻsiqlar ham olib tashlandi. Vokzalga kirish hududi obodonlashtirilib, avtomobillar uchun yoʻlaklar qilindi. Sifatli asfalt yotqizildi, yoʻlovchi va fuqarolar uchun yoʻlaklar tayyorlandi. Ayni paytda yangi qurilgan vokzal oldi yoʻlagi sinov tariqasida ishga tushirildi. Shuningdek, yoʻlakning kirish va chiqish qismlarida nazorat shlagbaumlari va video kuzatuv kameralari hamda yoʻl belgilari oʻrnatilib, yoʻlovchilarning kirib-chiqish xavfsizligi toʻliq taʼminlandi.

Endilikda vokzalga tashrif buyuruvchi yoʻlovchilar shaxsiy avtomashinalari, taksilar hamda turistlarga xizmat koʻrsatayotgan turli transport vositalari vokzalning kirish eshigiga qadar avtomobillarda kelib, yuk va yoʻlovchilarini tushirib, chiqib ketishlari mumkin. Bunda avtomobil vokzal oldi yoʻlagiga kelib toʻxtaydi, yuk va yoʻlovchilarini tushiradi yoki qabul qilib oladi. 

Agarda ushbu jarayon (avomobil kelib toʻxtagandan yurib ketgunga qadar) 5 daqiqani tashkish etsa – bepul, 5 daqiqadan 10 daqiqagacha boʻlgan vaqt oraligʻida belgilangan toʻlov asosida, 10 daqiqadan oshib ketgan taqdirda “Yoʻl harakati qoidalari”ning tegishli bandlariga muvofiq, jarima qoʻllanilishiga sabab boʻladi. Jarimalar inson omili ishtirokisiz qoidabuzarliklarni aniqlovchi maxsus kameralar orqali rasmiylashtiriladi.

Ayni paytda respublikaning barcha temiryoʻl vokzallariga yoʻlovchi va fuqarolar kirib-chiqishini yanada qulaylashtirish uchun barcha vokzallarda oʻrnatilgan panjarali toʻsiqlar olib tashlandi. 

Vokzallar hududiga kirish va chiqishlar bosqichma-bosqich tarzda “Toshkent-markaziy” temir yoʻl vokzalidek boʻlishi rejalashtirilib, yoʻl xaritasi ishlab chiqildi.