Oʻzbekiston ochiq maʼlumotlar boʻyicha Markaziy Osiyoda birinchi oʻrinda

Oliy Majlis Qonunchilik palatasidagi Oʻzbekiston Ekologik partiyasi fraksiyasining navbatdagi yigʻilishida “Rasmiy statistika sohasida davlat boshqaruvi tizimi takomillashtirilganligi munosabati bilan Oʻzbekiston Respublikasining ayrim qonun hujjatlariga oʻzgartirish va qoʻshimchalar kiritish toʻgʻrisida”gi qonun loyihasi muhokama qilindi.

Qonun loyihasi statistika organlarining faoliyatini takomillashtirish hamda rasmiy statistikadan foydalanuvchilar uchun yanada qulay shart-sharoitlar yaratishga qaratilgan.

Oʻzbekistonda Milliy statistika qoʻmitasi faoliyat koʻrsatmoqda. 2021 yilda “Rasmiy statistika toʻgʻrisida”gi qonun qabul qilindi. Oʻtgan davr mobaynida vazirlik va idoralar tomonidan taqdim etiladigan rasmiy hisobotlar 110 tadan 64 taga tushirildi, statistik maʼlumotlar raqamlashtirildi. 

Ayni paytda Oʻzbekiston ochiq maʼlumotlar boʻyicha xalqaro “Open Data Inventory” (ODIN) reytingida 2024 yil natijalariga koʻra, 198 ta mamlakat orasida 12-oʻringa koʻtarildi, Markaziy Osiyoda esa birinchi oʻrinni saqlab kelmoqda. Shuningdek, Jahon bankining 2024 yilda eʼlon qilingan “Statistika faoliyati samaradorligi indeksi” (SPI)da 2023 yil yakunlari boʻyicha Oʻzbekiston 217 mamlakat orasida 62-oʻrinni egallagan.