Avtomobil import qiluvchi tadbirkorlar prezidentga murojaat bilan chiqishdi

Asosan BYD elektromobillari savdosi bilan ishlovchi King Motors avtosalonining vakili davlat rahbari tomonidan yashil iqtisodiyotni rivojlantirish, aholi oʻrtasida elektromobillarni ommalashtirish borasida katta ishlar amalga oshirilayotganini taʼkidladi.

2023-yildan boshlab prezident qarori bilan yangi import qilingan avtomobillarni nafaqat ishlab chiqaruvchilarning rasmiy dilerlari, balki boshqa importerlar ham sotishga ruxsat berildi, shu sababli koʻplab kompaniyalar Xitoy va boshqa mamlakatlardan avtomobillarni olib kelib, ularni nisbatan arzonroq narxda sotishni boshladilar.

“Biz va boshqa 400 dan ortiq shu kabi tadbirkorlik subektlari tomonidan elektromobillarni sotish uchun avtosalonlar va ularga xizmat koʻrsatish uchun servis shoxobchalari tashkil etdik. Birgina 2023-yilning oʻzida biz kabi tadbirkorlar 630 million dollarlik 21 ming dona elektromobil olib keldi. QQS, utilizatsiya va boshqa toʻlovlar hisobiga byudjetga 1 trillion 250 milliard soʻm tushum tushdi”, — dedi tadbirkor.

Qolaversa, AJ Motors, Alliance Motors, CarBazaar, avtodiler.uz va boshqa kompaniyalar vakillari ham shu kabi murojaatlar bilan chiqishdi.

Oʻtgan yilning dekabr oyi oxirida hukumat avtomobillar, jumladan, elektromobillarni olib kirish qoidalarini kuchaytirish rejalarini muhokama qilayotgani xabar qilingandi. 2024-yildan boshlab jismoniy shaxslar tomonidan tijorat maqsadlarida avtomobillar olib kirishni taqiqlash va yangi xorijiy avtomobillarni faqat rasmiy dilerlar orqali sotish tartibiga qaytish allaqachon rejalashtirilgandi. Texnik jihatdan tartibga solish agentligining bildirishicha, loyiha tanqidlar tufayli toʻxtatilgan, biroq u endi yana kun tartibiga qaytdi.

25-mart kuni chiqqan Bosh vazir Abdulla Aripov qaroriga koʻra, 1-apreldan avtomobilning muvofiqlik sertifikati boshqa shaxs nomiga berilgan taqdirda, ularni bojxona rasmiylashtiruvidan oʻtkazish taqiqlanadi. Oʻzgarishlarning kuchga kirishi haqida rasmiy eʼlon qilinmadi. Shuningdek, yangi xorijiy avtomobillarni rasmiy dilerlar orqali sotish tartibini tiklash rejalashtirilgandi.

Yaqinda Texnik jihatdan tartibga solish agentligi oʻzgartirishlar 1-apreldan amalga oshirilishi rejalashtirilgani, ammo hozircha hujjat loyiha maqomida, yaʼni oʻzgarishlar hali kuchga kirmagani haqida xabar berdi.

2023-yilda UzAuto Motors 4,85 mlrd dollarlik 369,99 ming dona avtomobil ishlab chiqargani ortidan Oʻzbekiston avtomobil bozoridagi 81 foiz ulushni egalladi. 5,5% ulushni ADM Jizzakh olishga muvaffaq boʻldi, qolgan qismi importdan, shu jumladan 291 mln dollarlik tushum 8948 ta BYD rusumli avtomashinalar importidan kelib tushdi.

Gazeta.uz nashri bir necha soatdan so'ng o'z saytidan xabarni o'chirib tashladi.