Автомобил импорт қилувчи тадбиркорлар президентга мурожаат билан чиқишди

Асосан BYD электромобиллари савдоси билан ишловчи King Motors автосалонининг вакили давлат раҳбари томонидан яшил иқтисодиётни ривожлантириш, аҳоли ўртасида электромобилларни оммалаштириш борасида катта ишлар амалга оширилаётганини таъкидлади.

2023-йилдан бошлаб президент қарори билан янги импорт қилинган автомобилларни нафақат ишлаб чиқарувчиларнинг расмий дилерлари, балки бошқа импортерлар ҳам сотишга рухсат берилди, шу сабабли кўплаб компаниялар Хитой ва бошқа мамлакатлардан автомобилларни олиб келиб, уларни нисбатан арзонроқ нархда сотишни бошладилар.

“Биз ва бошқа 400 дан ортиқ шу каби тадбиркорлик субектлари томонидан электромобилларни сотиш учун автосалонлар ва уларга хизмат кўрсатиш учун сервис шохобчалари ташкил этдик. Биргина 2023-йилнинг ўзида биз каби тадбиркорлар 630 миллион долларлик 21 минг дона электромобил олиб келди. ҚҚС, утилизация ва бошқа тўловлар ҳисобига бюджетга 1 триллион 250 миллиард сўм тушум тушди”, — деди тадбиркор.Қолаверса, AJ Motors, Alliance Motors, CarBazaar, avtodiler.uz ва бошқа компаниялар вакиллари ҳам шу каби мурожаатлар билан чиқишди.

Ўтган йилнинг декабрь ойи охирида ҳукумат автомобиллар, жумладан, электромобилларни олиб кириш қоидаларини кучайтириш режаларини муҳокама қилаётгани хабар қилинганди. 2024-йилдан бошлаб жисмоний шахслар томонидан тижорат мақсадларида автомобиллар олиб киришни тақиқлаш ва янги хорижий автомобилларни фақат расмий дилерлар орқали сотиш тартибига қайтиш аллақачон режалаштирилганди. Техник жиҳатдан тартибга солиш агентлигининг билдиришича, лойиҳа танқидлар туфайли тўхтатилган, бироқ у энди яна кун тартибига қайтди.

25-март куни чиққан Бош вазир Абдулла Арипов қарорига кўра, 1-апрелдан автомобилнинг мувофиқлик сертификати бошқа шахс номига берилган тақдирда, уларни божхона расмийлаштирувидан ўтказиш тақиқланади. Ўзгаришларнинг кучга кириши ҳақида расмий эълон қилинмади. Шунингдек, янги хорижий автомобилларни расмий дилерлар орқали сотиш тартибини тиклаш режалаштирилганди.

Яқинда Техник жиҳатдан тартибга солиш агентлиги ўзгартиришлар 1-апрелдан амалга оширилиши режалаштирилгани, аммо ҳозирча ҳужжат лойиҳа мақомида, яъни ўзгаришлар ҳали кучга кирмагани ҳақида хабар берди.

2023-йилда UzAuto Motors 4,85 млрд долларлик 369,99 минг дона автомобил ишлаб чиқаргани ортидан Ўзбекистон автомобил бозоридаги 81 фоиз улушни эгаллади. 5,5% улушни ADM Jizzakh олишга муваффақ бўлди, қолган қисми импортдан, шу жумладан 291 млн долларлик тушум 8948 та BYD русумли автомашиналар импортидан келиб тушди.

Gazeta.uz нашри бир неча соатдан сўнг ўз сайтидан хабарни ўчириб ташлади.