“Davlat budjeti katta zarar ko‘rdi” – Rasul Kusherboyev 186 mlrd so‘mlik jinoyat ishi haqida gapirdi

Bekmurod Abdullayev 2021-yil aprel oyidan Ichki ishlar vaziri o‘rinbosari – Jamoat xavfsizligi departamenti boshlig‘i lavozimida ishlagan. U 2025-yil 3-noyabr kuni lavozimidan ozod etilgan. Shundan so‘ng tergov boshlanib, qamoqqa olingan.

Bekmurod Abdullayevga Jinoyat kodeksining 167-moddasi 2-qismi “a”, “b” bandlari, 167-moddasi 3-qismi “a”, “v” bandlari hamda 205-moddasi 2-qismi “a”, “b” bandlari bilan ayblov qo‘yilgan.

Bekmurod Abdullayev tadbirkor, BA Holding asoschisi va hozirda “O‘zmetkombinat” rahbari bo‘lgan Baxodir Abdullayevning akasi hisoblanadi.

Ayblanuvchilar ichida Rustam Tursunov ham bo‘lib, u  2017–2018 yillarda Jizzax viloyati IIB boshlig‘i, 2018-yildan Navoiy viloyati IIB boshlig‘i sifatida faoliyat yuritgan. 2021 yil fevral oyidan Jazoni ijro etish departamenti boshlig‘i sifatida ish boshlagan, 2025-yil noyabr oyi boshida, Bekmurod Abdullayev bilan bir kunda prezident farmoyishi bilan lavozimidan ozod etilgandi.

Prezident Shavkat Mirziyoyev joriy yil 27-yanvar kuni bo‘lib o‘tgan yig‘ilishda Ichki ishlar vazirligi tizimida davlat xaridlari davomida 186 mlrd so‘m byudjet mablag‘larining o‘zlashtirilgani aniqlangani hamda bu ish doirasida ichki ishlar vazirining sobiq o‘rinbosari Bekmurod Abdullayev va Jazoni ijro etish departamenti sobiq boshlig‘i Rustam Tursunovga qarshi jinoiy ish qo‘zg‘atilganini aytgandi.

Aprel oyida Bekmurod Abdullayev ozodlikka chiqqani ma’lum qilindi. U 200 mlrd so‘mdan ortiq zararni naqd pul shaklida to‘lab berganidan so‘ng, unga qo‘llangan qamoqqa olish tarzidagi ehtiyot chorasi garovga o‘zgartirilgan.

Bekmurod Abdullayev, Rustam Tursunov va yana 28 kishiga oid sud ishi shaxsiy hayotga oid hamda qonun bilan muhofaza etiladigan boshqa ma’lumotlar mavjudligi sababli yozda yopiq tarzda ko‘rildi.

Sudning 11-sentyabrdagi hukmi bilan Bekmurod Abdullayev va Rustam Tursunov oqlangani haqida ma’lumot paydo bo‘ldi. Sud jarayoni natijalari haqida esa hozircha rasmiy ma’lumot e’lon qilinmadi. 

Qalampir.uz ayblovlar o‘z tasdig‘ini topmagani va ular oqlangani haqida xabar berdi.

Bekmurod Abdullayev yangi lavozimga tayinlandi

Ichki ishlar vazirining tegishli buyrug‘i bilan general-mayor Bekmurod Abdullayev Chilonzor tumani IIO FMB boshlig‘i lavozimiga tayinlandi.

Davlat byudjeti katta zarar ko‘rdi - Rasul Kusherboyev

Ekologiya, atrof-muhitni muhofaza qilish va iqlim o‘zgarishi vazirining maslahatchisi, jamoatchilik faoli Rasul Kusherboyevning fikricha, ayblanuvchilarga qo‘yilgan zarar summasi juda katta – 186 mlrd so‘m ekanligi avval boshdan unda shubha uyg‘otgan.

O‘zbekiston qonunchiligiga ko‘ra, oqlangan yoki jinoyat ishi reabilitatsiya qiluvchi asoslar bilan tugatilgan shaxsga qonunga xilof jinoiy ta’qib oqibatida yetkazilgan mulkiy ziyon to‘liq qoplanadi. JPKning 304-moddasiga ko‘ra, bunga yo‘qotilgan ish haqi, mol-mulk qiymati, sud va yuridik yordam xarajatlari kiradi. Ushbu moddiy zarar davlat budjeti hisobidan qoplanadi.

Shuningdek, ma’naviy zarar uchun ham kompensatsiya talab qilish mumkin. 

“Ular haqida yolg‘on ma’lumotlarni tayyorlagan odamlar byudjetga, xalq to‘lagan soliq hisobidan yig‘ilgan g‘aznaga juda katta zarar yetkazishdi”, – dedi Rasul Kusherboyev.

Bunday katta ayblov uyushtiruvchilar jazolanishi yoki jazolanmasligi esa so‘roq ostida.

Bekmurod Abdullayev va Rustam Tursunovlar o‘rniga yangi tayinlovlar allaqachon amalga oshirib bo‘lingan.