Toshkent — Andijon oʻrtasida pulli yoʻl: vaqt 2 soatgacha qisqaradi

2030 yilga kelib esa pulli yoʻllar tarmogʻi 130 kilometrgacha kengaytiriladi. Asosiy yoʻnalishlar Toshkentdan Samarqandga hamda Fargʻona vodiysiga olib boruvchi avtomagistrallar boʻladi.

Ushbu maʼlumotlar jamoatchilik muhokamasi uchun SOVAZ portalida eʼlon qilingan yangilangan “Oʻzbekiston – 2030” strategiyasida keltirilgan. Qurilish rejasi yaqin besh yilga moʻljallangan boʻlib, pulli avtomobil yoʻllari uzunligini bosqichma-bosqich oshirishni nazarda tutadi:

• 2027 yil — 50 km
• 2028 yil — 75 km
• 2029 yil — 100 km

• 2030 yil — 130 km

   

Loyihalar davlat-xususiy sheriklik asosida

2023 yil sentabr oyida tasdiqlangan strategiyaning dastlabki tahririda Toshkent — Samarqand va Toshkent — Fargʻona vodiysi yoʻnalishlarida xususiy investorlar ishtirokida yangi avtomobil yoʻllari qurilishi rejalashtirilgan edi.

2025 yil dekabr oyida prezident Shavkat Mirziyoyev 2026 yildan boshlab asosiy yoʻnalishlar boʻyicha 800 kilometr yuqori tezlikdagi avtomagistrallar qurilishi boshlanishini maʼlum qildi. Ushbu yoʻnalishlar qatoriga quyidagilar kiradi:

• Toshkent — Samarqand
• Toshkent — Andijon
• Toshkent — Boʻstonliq
• Pungan — Namangan

• Qarshi — Shahrisabz

   

Toshkent — Andijon loyihasi

Toshkent — Andijon pulli avtomobil yoʻlini qurish boʻyicha tenderda uchta kompaniya ishtirok etish huquqini olgan. Gʻolibni 2026 yilning birinchi yarmida aniqlash rejalashtirilgan.

Uzunligi 314 kilometr boʻlgan yangi avtomagistral harakat vaqtini 2 soat 14 daqiqagacha qisqartiradi. Qurilish muddati taxminan 4 yilni tashkil etadi.

Loyihaning asosiy texnik koʻrsatkichlari:

• 1A toifadagi, sement-beton qoplamali, olti polosali avtomagistral
• Umumiy uzunligi 33 kilometr boʻlgan 10 ta tonnel
• 1 122 metr uzunlikka ega 102 ta yoʻl oʻtkazgich

• Maksimal harakat tezligi — 150 km/soat

   

Pulli yoʻllardan foydalanish narxi

Transport vazirligi huzuridagi Avtomobil yoʻllari qoʻmitasi vakili Hasan Umarovning maʼlum qilishicha, 200 kilometr pulli yoʻldan foydalanish narxi taxminan 100 ming soʻmni tashkil etishi mumkin.

Uning taʼkidlashicha, tariflar tabaqalashtirilgan boʻladi: toʻliq marshrut uchun ham, bosib oʻtilgan har bir kilometr uchun ham alohida hisob-kitob qilinadi. Narhlarni hisoblash metodikasi Vazirlar Mahkamasi tomonidan tasdiqlanadi, maksimal tariflar esa Transport vazirligi tomonidan belgilanadi.

Shuningdek, pulli avtomobil yoʻllari faqat bepul muqobil yoʻl mavjud boʻlgan taqdirdagina qurilishi qayd etildi.
 

Toshkent — Samarqand va Chorvoq loyihalarining holati

Toshkent — Samarqand pulli avtomobil yoʻli loyihasi hozirda yakuniy bosqichda. Davlat-xususiy sheriklik doirasida gʻolib deyarli aniqlangan, ammo u bilan shartnoma hali imzolanmagan. Qurilish ishlarini 2026 yilning birinchi choragida boshlash rejalashtirilmoqda.

Shuningdek, Toshkent va Chorvoq oʻrtasida 56 kilometr uzunlikdagi pulli avtomagistral barpo etiladi. Loyihaning texnik-iqtisodiy asoslari 2026 yilning oʻrtalariga qadar ishlab chiqiladi, qurilish ishlari esa yil oxirida boshlanishi kutilmoqda. Yillik transport oqimi 250 ming avtomobil darajasida boʻlishi prognoz qilingan.