Тошкент — Андижон ўртасида пулли йўл: вақт 2 соатгача қисқаради

2030 йилга келиб эса пулли йўллар тармоғи 130 километргача кенгайтирилади. Асосий йўналишлар Тошкентдан Самарқандга ҳамда Фарғона водийсига олиб борувчи автомагистраллар бўлади.

Ушбу маълумотлар жамоатчилик муҳокамаси учун SOVAZ порталида эълон қилинган янгиланган “Ўзбекистон – 2030” стратегиясида келтирилган. Қурилиш режаси яқин беш йилга мўлжалланган бўлиб, пулли автомобиль йўллари узунлигини босқичма-босқич оширишни назарда тутади:

• 2027 йил — 50 км
• 2028 йил — 75 км
• 2029 йил — 100 км

• 2030 йил — 130 км

   

Лойиҳалар давлат-хусусий шериклик асосида

2023 йил сентябрь ойида тасдиқланган стратегиянинг дастлабки таҳририда Тошкент — Самарқанд ва Тошкент — Фарғона водийси йўналишларида хусусий инвесторлар иштирокида янги автомобиль йўллари қурилиши режалаштирилган эди.

2025 йил декабрь ойида президент Шавкат Мирзиёев 2026 йилдан бошлаб асосий йўналишлар бўйича 800 километр юқори тезликдаги автомагистраллар қурилиши бошланишини маълум қилди. Ушбу йўналишлар қаторига қуйидагилар киради:

• Тошкент — Самарқанд
• Тошкент — Андижон
• Тошкент — Бўстонлиқ
• Пунган — Наманган

• Қарши — Шаҳрисабз

   

Тошкент — Андижон лойиҳаси

Тошкент — Андижон пулли автомобиль йўлини қуриш бўйича тендерда учта компания иштирок этиш ҳуқуқини олган. Ғолибни 2026 йилнинг биринчи ярмида аниқлаш режалаштирилган.

Узунлиги 314 километр бўлган янги автомагистрал ҳаракат вақтини 2 соат 14 дақиқагача қисқартиради. Қурилиш муддати тахминан 4 йилни ташкил этади.

Лойиҳанинг асосий техник кўрсаткичлари:

• 1А тоифадаги, цемент-бетон қопламали, олти полосали автомагистрал
• Умумий узунлиги 33 километр бўлган 10 та тоннель
• 1 122 метр узунликка эга 102 та йўл ўтказгич

• Максимал ҳаракат тезлиги — 150 км/соат

   

Пулли йўллардан фойдаланиш нархи

Транспорт вазирлиги ҳузуридаги Автомобиль йўллари қўмитаси вакили Ҳасан Умаровнинг маълум қилишича, 200 километр пулли йўлдан фойдаланиш нархи тахминан 100 минг сўмни ташкил этиши мумкин.

Унинг таъкидлашича, тарифлар табақалаштирилган бўлади: тўлиқ маршрут учун ҳам, босиб ўтилган ҳар бир километр учун ҳам алоҳида ҳисоб-китоб қилинади. Нарҳларни ҳисоблаш методикаси Вазирлар Маҳкамаси томонидан тасдиқланади, максимал тарифлар эса Транспорт вазирлиги томонидан белгиланади.

Шунингдек, пулли автомобиль йўллари фақат бепул муқобил йўл мавжуд бўлган тақдирдагина қурилиши қайд этилди.
 

Тошкент — Самарқанд ва Чорвоқ лойиҳаларининг ҳолати

Тошкент — Самарқанд пулли автомобиль йўли лойиҳаси ҳозирда якуний босқичда. Давлат-хусусий шериклик доирасида ғолиб деярли аниқланган, аммо у билан шартнома ҳали имзоланмаган. Қурилиш ишларини 2026 йилнинг биринчи чорагида бошлаш режалаштирилмоқда.

Шунингдек, Тошкент ва Чорвоқ ўртасида 56 километр узунликдаги пулли автомагистрал барпо этилади. Лойиҳанинг техник-иқтисодий асослари 2026 йилнинг ўрталарига қадар ишлаб чиқилади, қурилиш ишлари эса йил охирида бошланиши кутилмоқда. Йиллик транспорт оқими 250 минг автомобиль даражасида бўлиши прогноз қилинган.