Жиззахда юк машинасига урилган Lacetti ёниб кетди. 5 киши ҳалок бўлди

Дастлабки маълумотларга кўра, Қашқадарё вилояти Чироқчи туманида яшовчи, 2003 йилда туғилган ҳайдовчи бошқарган Isuzu юк машинаси газ қуйиш шохобчасидан чиқиш пайтида йўлдаги “Йўл беринг” (2.4) ва “Ҳаракатланиш ўнгга” (4.1.2) белгиларининг талабларига риоя қилмай қатнов қисмига чиққан.

Шу вақтда Самарқанд йўналиши бўйлаб ҳаракатланиб келаётган, Сурхондарё вилояти Олтинсой туманида яшаган 2002 йилда туғилган ҳайдовчи бошқарган Lacetti автомобили юк машинасига урилиб кетган.

Зарба таъсирида Lacetti бутунлай ёниб кетган. Ҳодиса оқибатида ушбу автомобил ҳайдовчиси ва салонидаги 4 нафар йўловчи voqea joyida ҳалок бўлган.

Мазкур ҳолат юзасидан Жиззах вилояти ИИБ ҳузуридаги Тергов бошқармаси томонидан ЖК 266-моддаси 3-қисми “а” банди билан жиноят иши қўзғатилган. Тергов ҳаракатлари давом этмоқда.

Бундан аввал Андижонда оралиқ масофага риоя қилинмагани сабаб 4 та автомобил иштирокида ЙТҲ содир бўлгани хабар қилинган эди.