Чет тили ўқитувчиларига сертификат олиш учун яна имконият берилди

Сўнгги кунларда умумтаълим мактабларида фаолият юритаётган, тегишли тил сертификатига эга бўлмаган хорижий тил фани ўқитувчиларининг келгуси меҳнат фаолияти масаласи жамоатчилик эътиборида бўлиб келмоқда.

Таълим

14.01.2026, 11:38

Lotinchada

Улашиш:

Мазкур масала юзасидан Мактабгача ва мактаб таълими вазирлиги расмий муносабат билдирди.

Маълумки, Вазирлар Маҳкамасининг 2021 йил 19 майдаги қарорига мувофиқ, умумий ўрта таълим муассасаларида фаолият юритаётган хорижий тил ўқитувчилари камида B2 даражадаги миллий ёки унга тенглаштирилган халқаро сертификатга эга бўлиши лозим. Ушбу талабни бажариш муддати 2024–2025 ўқув йилига қадар белгиланган бўлса-да, педагоглар ва жамоатчилик мурожаатлари асосида бир неча бор узайтирилган.

Вазирликнинг тегишли буйруғига кўра, хорижий тил фани ўқитувчиларининг лавозим малака тавсифларига B2 даражадаги миллий ёки унга тенглаштирилган халқаро сертификатга эга бўлиш талаби асосий мезон сифатида киритилди. Шу билан бирга, бундай сертификатга эга бўлмаган педагогларга 2026–2027 ўқув йили бошлангунига қадар яна имконият берилиши маълум қилинди.

Маълумот ўрнида айтиш жоизки, вазирлик томонидан ўқитувчиларнинг сертификат имтиҳонларига тайёргарлигини кучайтириш мақсадида жойларда малакали мутахассислар иштирокида бепул онлайн ва офлайн ўқув машғулотлари ташкил этилган.

Натижада, 2025 йилнинг сентябрь–декабрь ойларида 5 минг нафардан ортиқ педагог тил сертификатларини қўлга киритган. Ҳозирда 39 мингдан зиёд хорижий тил фани ўқитувчилари тегишли сертификатга эга бўлиб, бу уларнинг таълим сифати ва моддий рағбатдорлигига ижобий таъсир кўрсатмоқда.

Таълим

14.01.2026, 11:38

Улашиш:

#имконият #тил сертификати

мавзуга оид янгиликлар