Венгрияда ҳокимият алмашди: Петер Мадьяр сайловда ғалаба қозонди

Амалдаги бош вазир Виктор Орбан мағлубиятни тан олиб, натижани “оғриқли, аммо аниқ” дея баҳолади.

Дастлабки маълумотларга кўра, Мадьярнинг “Tisza” партияси парламентда учдан икки қисм ўринни қўлга киритмоқда. Бу эса унга конституцияга ўзгартиш киритиш имконини беради. Орбаннинг “Fidesz” партияси эса кескин тарзда ўринларини йўқотиб, тахминан 55 мандат билан чекланмоқда.

Петер Мадьяр сайловолди кампаниясида коррупцияга қарши кураш, иқтисодий муаммолар ва соғлиқни сақлаш тизимини ислоҳ қилишга урғу берди. Виктор Орбан эса сайловчиларга Украинадаги уруш хавфи орқали таъсир ўтказишга ҳаракат қилган.

Сайлов натижалари халқаро майдонда ҳам катта акс-садо берди. Европа етакчилари ушбу натижани ижобий баҳолади. Хусусан, Урсула фон дер Ляйен Венгрия “Европани танлади” дея баёнот берди.

Франция президенти Эммануэль Макрон ва Буюк Британия бош вазири Кир Стармер ҳам бу натижани Европа демократияси учун муҳим воқеа сифатида баҳолади.

АҚШ собиқ президенти Барак Обама эса сайлов натижасини “демократия ғалабаси” деб атади.

Таҳлилчиларга кўра, мазкур натижа Венгрияда 16 йил давом этган Виктор Орбан даврига якун ясаб, мамлакат сиёсий ҳаётида янги босқични бошлаб бериши мумкин.