Дунёда хавфли вирус сабаб янги пандемия бошланиши мумкин — ЖССТ

Экспертлар хулосасига кўра, оғир геморрагик иситмани келтириб чиқарувчи ушбу инфекциядан ўлим даражаси ўта юқори — 90 фоизга тенг. Ҳозир Африка қитъасининг Руанда давлатида мазкур патология билан боғлиқ кўплаб ҳолатлар қайд этилган. Олимлар хавфли вирус энди Ер юзи бўйлаб кенг тарқалишидан хавотирда. 

Маълум билишича, Марбург иситмаси одамларга кўршапалаклардан юқиши мумкин. Қолаверса, инфекцияга чалинган беморлардан ажраладиган биологик суюқликлар (қон, тупик, пешоб) билан бевосита алоқа қилиш, шунингдек, турли жисмлар юзалари орқали ҳам фаол тарқалади. 

Мутахассисларнинг таъкидлашича, Марбург вируси Эбола сингари ўта юқумли бўлиб, ҳозирча тасдиқланган даво муолажалари мавжуд эмас. Қолаверса, бу хасталикка қарши вакциналар ҳам яратилмаган.

"Касаллик белгилари бошқа тропик иситма патологиялари билан ўхшаш. ЖССТ маълумотларига кўра, аломатлар тўсатдан бошланади ва бемор юқори тана ҳарорати, кучли бош оғриғи ҳамда безовталикдан азият чекади. Мушакларда оғриқлар кучайиб, тез-тез судирги юз беради. Қолаверса, диарея, кўнгил айниши ва қайт қилиш ҳолатлари ҳам кузатилиши мумкин", дейилади Соғлиқни сақлаш вазирлиги матбуот хизмати томонидан берилган хабарда.

Унда қўшимча қилинишича, касалликнинг бешинчи кунида кўкрак, орқа ва қорин бўшлиғида тошмалар пайдо бўлиши мумкин. Оғир вазиятларда эса саккизинчи-тўққизинчи кунга бориб ўлим ҳолати содир бўлиши эҳтимоли бор. 

Эслатиб ўтамиз, аввалги йилларда Марбург вируси Гана ва Экваториал Гвинея мамлакатларида ҳам рўйхатга олинган.