Адолф Гитлер туғилган шаҳарда тўққизта оммавий қабр топилди

Австриянинг Браунау ам Инн шаҳрида, яъни Адольф Гитлернинг туғилган жойида археологлар 120 дан ортиқ кишининг жасад қолдиқларини топди. Мазкур жой Рансхофен туманида жойлашган.

Март ойида бир қизалоқ суяк топиб олгач, унинг онаси полицияга хабар берган. Дастлабки текширувлар қолдиқлар инсонга тегишли эканлигини тезда тасдиқлайди. Шундан сўнг Австрия Федерал ёдгорликлар бошқармаси жалб этилиб, археологик қазиш ишлари бошлаб юборилди.

Тўққизта оммавий қабр очилди

Аввалига якка топилмадек кўринган нарса тезда шов-шувли янгиликка айланди. Археологлар дастлаб олтита, кейинроқ эса жами тўққизта оммавий қабрни аниқлади.

Скелетлар тахминан 150 квадрат метр майдонда тартибсиз ётарди. Мутахассислар фикрича, марҳумлар чуқурларга шошилинч равишда кўмиб ташланган.

Лойиҳа раҳбари Михаэла Биндер “Kronen Zeitung” нашрига берган интервьюсида бу топилмани “бутун Марказий Европада ягона” деб таърифлади.

Кимлар кўмилган?

Суяк қолдиқлари асосан 15 ёшдан 25 ёшгача бўлган йигитларга тегишли. Уларнинг ўлими сабаби ҳозирча ноаниқ. Тадқиқотчилар ўқ жароҳатларига оид бирор-бир далил топа олмади.

Бироқ бир ҳолатда ўлимдан бироз аввал болдир ампутация қилингани аниқланди – эҳтимол бу ўша давр шароитидаги тиббий муолажадан дарак беради.

Дастлабки антропологик текширувлар ҳамда қабрларнинг жойлашуви бу кишилар 1792–1815-йиллар оралиғидаги “Француз урушлари” даврида ҳалок бўлганини кўрсатмоқда.

Улар ҳарбий госпитал ёки дала лагерида вафот этиб, кейин бир жойга дафн этилган бўлиши мумкин. ДНК ва изотоп тадқиқотлари каби кейинги таҳлиллар марҳумларнинг келиб чиқиши, овқатланиш тарзи ва ўлимининг эҳтимолий сабабларига ойдинлик киритиши кутилмоқда.

Тарихий аҳамиятга молик топилма

Археологларнинг фикрича, бу Марказий Европада ҳозиргача маълум бўлган Наполеон урушлари даврига оид энг йирик оммавий қабристонлардан бирига айланиши мумкин.

Бундай топилмалар жуда кам учрайди ва XIX аср бошларида ёш аскарларнинг яшаш ва ўлим шароитлари ҳақида қимматли маълумотлар беради.

Аммо кашфиётнинг миллатчи-социализмга ҳеч қандай алоқаси йўқ. Марҳумлар Адольф Гитлер туғилишидан ўнлаб йиллар аввал дафн этилган.

Шунга қарамай, топилма ўзининг жойлашуви билан эътиборни тортмоқда: Браунау ам Инн шаҳри халқаро миқёсда Гитлернинг туғилган жойи сифатида танилган.

Ҳудуддаги археологик тадқиқотлар давом этар экан, олимлар яқин ҳафталарда яна қабрлар топилиши мумкинлигини истисно этмаяпти.