Бўстонлиқда “Чимён” умуммавсумий курорти барпо этилмоқда

Сўнгги йилларда ҳудудда Амирсой, Чиноркент ва Чорвоқ дарвозаси каби йирик туристик мажмуалар, замонавий меҳмонхона ва дам олиш масканлари ишга туширилган бўлса, энди улар сафини янги курорт тўлдиради. Лойиҳа Франциянинг MND компанияси ҳамкорлигида амалга оширилмоқда ва 1 278 гектар майдонда барпо этиляпти.

Курортда меҳмонхоналар, савдо ва овқатланиш мажмуалари, осма дор йўл, апарт-отеллар, ресторанлар ҳамда 300 ўринли тураргоҳ барпо этилмоқда. Қишда чанғи ва сноуборд, бошқа фаслларда эса тоғ сайёҳлиги ҳамда кўнгилочар ҳордиқ имкониятлари яратилади.

Шунингдек, 1 450 метрлик туннел қурилиб, тоғ курортларига олиб борувчи асосий йўл қисқариши ва хавфсизлиги таъминланиши қайд этилди.

“Чимён” курорти ишга тушиши билан минглаб янги иш ўринлари яратилиб, ҳар йили юз минглаб маҳаллий ва хорижий туристлар қабул қилиниши кутилмоқда. Бу эса Бўстонлиқнинг иқтисодий қиёфасини тубдан ўзгартириши ва мамлакат туризм салоҳиятини ошириши таъкидланди.