AQSH Saudiya Arabistoni bilan yadro energetikasi bo‘yicha tarixiy kelishuvni ma’qulladi

elishuvga ko‘ra, Saudiya Arabistonida yadro energetikasi infratuzilmasini barpo etishda asosiy rol AQSH kompaniyalariga beriladi. Bu esa Rossiya, Xitoy va boshqa xorijiy raqobatchilarni loyihadan amalda chetlatadi.

Bitimning eng muhim bandlaridan biri - zarurat tasdiqlansa, AQSH kompaniyalari Saudiya Arabistonida uranni boyitish zavodini qurishi mumkin. Oq uy bu orqali Vashington qirollikning yadro dasturi ustidan nazorat va ta’sirini saqlab qolishini, dasturning harbiy maqsadlarga yo‘naltirilishining oldi olinishi mumkinligini ta’kidlamoqda.

Yaqin kunlarda kelishuv AQSH Kongressi ko‘rib chiqishiga yuboriladi. Ayrim kongressmenlar Yaqin Sharqda uranni boyitish texnologiyalarining tarqalishiga qarshi chiqishi kutilmoqda. Biroq AQSH qonunchiligiga ko‘ra, bunday bitimni to‘xtatish juda murakkab: buning uchun Kongressning har ikki palatasida uchdan ikki qism ovoz bilan prezident vetosini bekor qilish talab etiladi.

Xalqaro nashrlarning qayd etishicha, ushbu kelishuv AQSH yadro sanoatini jonlantirishi, Vashington va Ar-Riyod o‘rtasidagi strategik hamkorlikni yanada mustahkamlashi hamda Saudiya Arabistonining yadro energetikasi bozorida Rossiya va Xitoyning ta’sirini sezilarli darajada cheklashi mumkin.

Shu bilan birga, ekspertlar uranni boyitish imkoniyatining paydo bo‘lishi uzoq muddatda Yaqin Sharqda yadro qurolining tarqalishi xavfini ham oshirishi mumkinligi haqida ogohlantirmoqda.