Ar-Riyod aeroportiga uyushtirilgan hujumlarda 3 nafar Qirollik fuqarosi halok bo‘ldi

Saudiya Arabistoni fuqaro aviatsiyasi boshqarmasi xabar berishicha, 8-oktyabr kuni Ar-Riyodda joylashgan Qirol Xolid nomidagi xalqaro aeroportga qilingan ikkita hujum oqibatida 3 nafar Saudiya fuqarosi halok bo‘lgan, yana bir necha kishi jarohatlangan. Bu haqda Reuters nashri yozdi.

Birinchi hujumda aeroport inshootlariga, ikkinchisida esa Saudiya Arabistonining Saudia davlat aviakompaniyasiga tegishli samolyotga zarba berilgan.

Aeroport faoliyati qayta tiklanib, aviaqatnovlar odatiy tartibga qaytgani qo‘shimcha qilindi.

Tomonlarning bayonotlari

Yamandagi Eronning proksi kuchi sifatida ta’riflanadigan husiylar payshanba kuni aeroportga ikkita qanotli raketa bilan hujum qilganini bildirdi. Shuningdek, guruh janubi-g‘arbdagi Najron shahri aeroportini (bu da’vo Saudiya rasmiylari tomonidan tasdiqlanmagan) hamda Xamis-Mushayt shahridagi aviabazani ballistik raketalar bilan nishonga olganini aytdi.

Husiylarning bildirishicha, ular Yamanda qayta avj olgan fuqarolar urushida hukumat kuchlarini qo‘llab-quvvatlayotgani sababli qirollikka hujum qilmoqda. 

Saudiya Arabistoni esa BMT tomonidan tan olingan Yaman hukumati hududlarini husiylardan qaytarib olish harakatlariga ko’maklashayotganini aytmoqda.

Avvalroq Turkiya Makka mudofaa pakti doirasida Saudiya Arabistonida harbiy baza qurishini xabar qilgandik.