БМТ: Ғазода ўқ узишни зудлик билан тўхтатиш зарур

БМТ Бош котиби матбуот котиби ўринбосари Фарҳан Ҳақ Нью-Йоркдаги кундалик матбуот анжуманида Ғазодаги вазият ҳақида маълумот берди.

Унинг сўзларига кўра, Исроил тўрт кун аввал эълон қилинган «тактик танаффус» доирасида гуманитар ёрдамга чекланган миқдорда рухсат берган бўлса-да, ёрдам олишга уринаётган одамлар ҳали ҳам ҳужумларга учраётгани ва очликдан ҳалок бўлаётганлар сони ошиб бораётгани қайд этилди.

Фарҳан Ҳақнинг таъкидлашича, Ғазодаги гуманитар ходимлар ҳам оғир чарчоқ, етарлича овқатланмаслик ва руҳий соғлиқ муаммолари билан курашмоқда.

БМТ ҳар қандай имкониятдан фойдаланиб ёрдам тарқатишга ҳаракат қилаётганини айтган Ҳақ, бунинг учун шароит ҳали ҳам жуда ёмон эканини қайд этди.

Унинг таъкидлашича, Исроилнинг гуманитар ёрдам беришга чекланган кўринишда берган рухсати етарли эмас ва улкан гуманитар эҳтиёжларни қондириш учун Ғазода доимий ўқ узишни тўхтатиш лозим.

Унинг қўшимча қилишича, Ғазога етказилаётган ёқилғи миқдори аҳоли ҳаётини сақлаб қолиш учун зарур бўлган критик эҳтиёжларни асло қондира олмайди. Барча назорат-ўтказиш пунктлари очилиши, гуманитар ва тижорат юклар ўтказилиши керак. Ёрдам кўрсатаётган инсонлар эса ҳимояланиши шарт.

Фарҳан Ҳақ ҳаво орқали ёрдам етказиш масаласига тўхталиб:

“Биз ҳеч қандай ёрдамдан воз кечмаймиз, бироқ бундай етказиб бериш хавфли ва унда келаётган ёрдам миқдори жуда оз”, — деди.

У БМТ ер орқали ёрдам етказишни устувор деб ҳисоблашини, ҳаво орқали ёрдам ташлаш ташаббусларида БМТ иштирок этмаётганини маълум қилди.