BMT: Gʻazoda oʻq uzishni zudlik bilan toʻxtatish zarur

BMT Bosh kotibi matbuot kotibi oʻrinbosari Farhan Haq Nyu-Yorkdagi kundalik matbuot anjumanida Gʻazodagi vaziyat haqida maʼlumot berdi.

Uning soʻzlariga koʻra, Isroil toʻrt kun avval eʼlon qilingan «taktik tanaffus» doirasida gumanitar yordamga cheklangan miqdorda ruxsat bergan boʻlsa-da, yordam olishga urinayotgan odamlar hali ham hujumlarga uchrayotgani va ochlikdan halok boʻlayotganlar soni oshib borayotgani qayd etildi.

Farhan Haqning taʼkidlashicha, Gʻazodagi gumanitar xodimlar ham ogʻir charchoq, yetarlicha ovqatlanmaslik va ruhiy sogʻliq muammolari bilan kurashmoqda.

BMT har qanday imkoniyatdan foydalanib yordam tarqatishga harakat qilayotganini aytgan Haq, buning uchun sharoit hali ham juda yomon ekanini qayd etdi.

Uning taʼkidlashicha, Isroilning gumanitar yordam berishga cheklangan koʻrinishda bergan ruxsati yetarli emas va ulkan gumanitar ehtiyojlarni qondirish uchun Gʻazoda doimiy oʻq uzishni toʻxtatish lozim.

Uning qoʻshimcha qilishicha, Gʻazoga yetkazilayotgan yoqilgʻi miqdori aholi hayotini saqlab qolish uchun zarur boʻlgan kritik ehtiyojlarni aslo qondira olmaydi. Barcha nazorat-oʻtkazish punktlari ochilishi, gumanitar va tijorat yuklar oʻtkazilishi kerak. Yordam koʻrsatayotgan insonlar esa himoyalanishi shart.

Farhan Haq havo orqali yordam yetkazish masalasiga toʻxtalib:

“Biz hech qanday yordamdan voz kechmaymiz, biroq bunday yetkazib berish xavfli va unda kelayotgan yordam miqdori juda oz”, — dedi.

U BMT yer orqali yordam yetkazishni ustuvor deb hisoblashini, havo orqali yordam tashlash tashabbuslarida BMT ishtirok etmayotganini maʼlum qildi.