Франция ва Испания ўрмон ёнғинларига қарши курашмоқда

27-июл куни ўрмон ёнғинлари Франциянинг тарихий Бордо шаҳри чеккаларига яқинлашди. Айни пайтда Франция ва Испания юз минглаб одамларни эвакуация қилишга мажбур қилган аланга билан курашмоқда.

Расмийларнинг маълум қилишича, Францияда 220 000 га яқин, Испанияда эса 75 000 дан ортиқ киши эвакуация қилинган ва яна 30 000 кишига ўз жойида қолиб, бошпана топиш буюрилган.

Францияда ёнғинлар Атлантика океани соҳилидаги машҳур сайёҳлик маскани — Кап-Ферре ярим оролини қамраб олди ва Бордо шаҳри атрофидаги ҳудудларга тарқалди. Ўт ўчирувчилар аланганинг минтақа марказига етиб боришининг олдини олишга ҳаракат қилмоқда.

Бордо мери Томас Казнавенинг айтишича, ёнғин шаҳар марказига кириш нуқталаридан тахминан 15 км узоқликда.

“Назоратдан чиққан ёнғин шаҳар ҳудуди томон ҳаракатланмоқда. Умумий вазият жуда ёмон, биз илгари кузатилмаган ҳолатга дуч келдик”, — деди ички ишлар вазири Лоран Нунес.

Аввалроқ аҳолиси 850 минг кишига яқин бўлган Бордо ва унинг атрофидаги ҳудудларни эвакуация қилиш режалаштирилмагани айтилган эди.

Ёнғин тарқалиб боргани сари полиция туни билан Марчеприме ва Сестас муниципалитетларида уйма-уй юриб, аҳолини эвакуация қилди. Франция ҳукумати зобитларнинг қоронғида эшикларни тақиллатиб, одамларни уйларини тарк этишга ундаётгани акс этган видеолавҳаларни эълон қилди.

Испания Бош вазири Педро Санчес йирик ёнғинлар рўй берган учта марказий вилоятдан бири — Авила ҳудудига ташриф буюрди. Мадрид ва Толедо ҳам ёнғиндан жабр кўрган вилоятлар сирасига киради.

Аланга Авиладаги 50 минг гектардан ортиқ қишлоқ жойларини вайрон қилган ва бу Испаниянинг яқин тарихидаги энг катта ёнғин бўлди.

Испания бир нечта ёнғин билан курашмоқда

Испаниянинг шарқий Кастельон провинциясида юз берган яна бир ёнғин 4300 гектардан ортиқ майдонни вайрон қилган.

Ўрмон ёнғини қарағай ва пўкак эмани ўрмонларига бой Сьерра-де-Эспадан табиат боғига кириб борди.

Бу ёнғинлар узоқ давом этган қурғоқчилик ва кетма-кет кузатилган жазирама тўлқинлари билан боғлиқ сўнгги фалокатлар бўлиб, олимларнинг фикрича, улар иқлим ўзгариши туфайли кучайган.

“Reuters Climate Monitor” маълумотларига кўра, Бордо ва Авилада июл ойидаги энг юқори ҳарорат ўртача 32 даража Селсийни (90 даража Фаренгейт) ташкил этган, бу 1961–1990-йиллар оралиғидаги ойлик меъёрий кўрсаткичдан деярли 6 даража юқоридир.