Нетаняҳунинг БМТдаги нутқи пайтида аксарият делегациялар зални тарк этди

Нью-Йоркда, БМТ Бош Ассамблеясининг 81-сессиясида Исроил бош вазири Беньямин Нетаняҳу минбарга чиққанида залда кескин вазият юзага келди. Ўнлаб делегатлар унинг нутқи бошланиши билан зални тарк этди, бошқалардан эса олқиш ва норозилик овозлари эшитилди. Натижада залнинг катта қисми бўшаб қолди. Associated Press маълумотига кўра, Фаластиннинг БМТдаги миссияси аъзо давлатлар вакилларини Нетаняҳу минбарга чиққанда коллектив равишда зални тарк этишга чақирган эди. 

Нетаняҳу эса кетаётган делегатларга кескин муносабат билдирди: 

"Агар зални ҳали тарк этмаган бошқа маънавий қўрқоқлар бўлса, илтимос, ҳозир чиқиб кетинг."
 

Нетаняҳу нутқини давом эттириб, Исроил армияси ҳаракатларини оқлади ва минбарга пейжерни олиб чиқиб, «Ҳизбуллоҳ»га қарши операцияни эслатди.

«Исроил ҲАМАСга зарба берди, «Ҳизбуллоҳ»га зарба берди. Пейжерларни эслайсизми?», деди у минбардан туриб.

Нетаняҳу «Ҳизбуллоҳ» Исроилни мағлуб этишни режалаштиргани, бироқ армиянинг ҳаракатлари ва иттифоқчиларнинг ёрдами туфайли бу амалга ошмаганини билдирди. 2024 йил 17-сентябрь кунлари Ливаннинг турли ҳудудларида «Ҳизбуллоҳ» аъзоларининг алоқа воситалари, жумладан, пейжерлар ва рациялар портлади. Ушбу операцияда 32 киши ҳалок бўлди, 3 мингдан ортиқ киши яраланди. Исроил бош вазири БМТдаги нутқида Эрон, Ғазо ва Яқин Шарқнинг бошқа ҳудудларидаги ҳарбий кампанияларни ҳам ҳимоя қилди.

«Биз ғалаба қозонамиз. Бошқа иложимиз йўқ», деди у.

Шунингдек, Нетаняҳу Исроил Ғазода геноцид содир этаётгани ҳақидаги айбловларни рад этди. Унинг баёноти бир неча соат аввал Фаластин президенти Маҳмуд Аббоснинг БМТда қилган мурожаатидан кейин янгради. Аббос Исроил сиёсати, хусусан, босиб олинган Ғарбий Соҳилдаги яҳудий аҳоли пунктларининг ноқонуний кенгайиши Фаластин халқининг ўз ватанидаги ҳаёти ва мавжудлигига таҳдид солаётганини айтганди. У Исроил ҳарбийлари Ғазодаги фаластинликларни «ўлдириш, вайрон қилиш, очарчилик, кўчириб ўтказишга уринишлар, шунингдек, геноцид уруши»га дучор қилаётганини таъкидлаган.
 

Фаластин раҳбари АҚШга кириш визаси рад этилгани сабабли йиллик йиғилишда видеоалоқа орқали нутқ сўзлаган. Халқаро жиноий суд томонидан ҳибсга олиш ордери берилган Нетаняҳу уни танқид қилган давлатлар ва етакчиларга қарши кескин фикрлар билдирди.

«Улар Исроилни — миттигина Исроилни — мустамлакачиликда айбламоқда. Буни бизга кимлар айтяпти? Улар орасида Британия ва Франция бор. Бу иборани уларнинг ўзи ўйлаб топган-ку! Уларнинг мустамлакалари бутун дунёни қамраб олган эди», деди у.

У Туркия президенти Ражаб Тоййиб Эрдоғонни ҲАМАС гуруҳини қўллаб-қувватлашда айблаб, уни «тиран» деб атади. Бу айбловга Туркия президентлигининг коммуникациялар бўйича директори Бурҳанеттин Дуран кескин муносабат билдирди.

«Исроил бош вазирининг БМТ минбаридан фойдаланиб, Туркия ва Эрдоғонга қарши асоссиз айбловлар қўйиши БМТнинг тинчлик, ҳуқуқ ва мулоқот идеалларига мос келмайди», деди у.