Озарбайжон Исроилнинг арманлар геноцидини тан олганидан норози

Озарбайжон 29 июнь куни Исроилнинг Биринчи жаҳон уруши давридаги арманлар қирғинини геноцид деб тан олиш ҳақидаги қарорини қоралади. Исроилнинг бу қадами Туркияга нисбатан танбеҳ сифатида баҳоланмоқда.

Озарбайжон ва Исроил иттифоқчи бўлса-да, Бокунинг энг яқин ташқи ҳамкори Туркия ҳисобланади. Кавказ давлати Исроилнинг мазкур ҳаракати икки томонлама муносабатларга путур етказиши мумкинлигига ишора қилди.

Исроилнинг бу эътирофи “жиддий хавотир” уйғотмоқда, дейилади Озарбайжон Ташқи ишлар вазирлиги баёнотида.

Арман геноциди

Арманистон узоқ вақтдан бери 1915–1917 йилларда – Усмонли империяси даврида содир этилган оммавий қотилликлар геноцидга тенг эканлиги ва бунда 1,5 миллион киши ҳалок бўлганини халқаро ҳамжамият томонидан тан олинишига ҳаракат қилиб келади.

Туркия геноцид айбловини қатъий рад этиб, Биринчи жаҳон уруши оқибатида арманлар ҳам, турклар ҳам ўлганини таъкидлайди. Туркия ҳисобича, ҳалок бўлганлар сонини юз минглар атрофида.

АҚШ, Франция ва Германия каби йигирмадан ортиқ давлат бу қотилликларни геноцид сифатида тан олади.

“Бундай ҳаракатлар ярашувга ёки ўзаро ҳамжиҳатликка хизмат қилмайди”, — дейилади Озарбайжоннинг Исроил қарорига муносабатида.

Озарбайжон ва Исроил мудофаа ҳамда хавфсизлик соҳасида кенг миқёсли ҳамкорликка эга.

Туркия ва Исроил 

Исроилнинг олдинма-кетин келган ҳукуматлари арман геноцидини расман тан олишдан чекиниб келган. Чунки бир вақтлар Исроилнинг минтақадаги энг яқин стратегик ҳамкорларидан бири Туркия эди.

Аммо Ғазода уруш бошланганидан бери Туркия мунтазам равишда Исроилни Фаластин ҳудудида геноцид содир этишда айблаб келмоқда, Исроил эса айбловни инкор этади.

Қорабоғ можаросининг юмшаши

Озарбайжон ва Арманистон ўттиз йил давомида арман айирмачилари томонидан бошқарилган Озарбайжон эксклави – Қорабоғ мақоми юзасидан ўнлаб йиллар давомида можаро ичида бўлган.

Эндиликда икки қўшни кескинликни юмшатиш ва кенг қамровли тинчлик битимини якунлаш сари қадамлар ташламоқда.