ИИВ матбуот анжумани: тизимдаги шаффофлик масалалари муҳокама қилинди

Унда соҳадаги долзарб масалалар юзасидан очиқ мулоқот ўтказилиб, оммавий ахборот воситалари вакилларининг саволларига жавоб берилди.

Анжуман давомида журналистлар томонидан ҳуқуқни муҳофаза қилувчи органлар фаолиятидаги шаффофлик, ходимларнинг ҳуқуқий ҳимояси ҳамда тизимдаги ички муносабатларга доир масалалар кўтарилди.

Жумладан, Paradigma.uz нашри журналисти Азиз Солиев ИИВ Академиясини тамомлаб хизматга кирган ёш лейтенантларнинг амалиётда дуч келган муаммолари,  жумладан, айрим ҳолатларда ёш ходимлар раҳбариятнинг эҳтимолий ички талаблари ва қонун устуворлиги ўртасида танлов қилишга мажбур бўлиши мисолида савол берди.

Ички ишлар вазири ўринбосари Рамазон Ашропов ушбу саволга жавоб берар экан, тизимда ходимларни ҳимоя қилишга қаратилган бир қатор механизмлар жорий этилганини маълум қилди. Унинг сўзларига кўра, раҳбарият томонидан босим ўтказилган ёки ноқонуний топшириқлар берилган ҳолатларда, ходимлар махсус Telegram гуруҳлари орқали мурожаат қилишлари, шунингдек, вазирликнинг ишонч телефонлари орқали хабар бериш имкониятига эга.

Таъкидланишича, мазкур механизмлар ходимларнинг ҳуқуқий ҳимоясини таъминлаш, тизимда шаффофликни кучайтириш ва коррупция хавфини камайтиришга хизмат қилади. Шу билан бирга, бу каби ёндашув ёш ходимларда қонунга содиқлик ва адолат тамойилларига таяниш ҳиссини мустаҳкамлайди.